CHAPITRE XXVI

COMMENT NOUS DESCENDISMES EN L'ISLE D'ODES, EN LAQUELLE LES CHEMINS CHEMINENT

Avoir par deux jours navigé, s'offrit à nostre veuë l'Isle d'Odes, en laquelle vismes une chose mémorable. Les chemins sont animaux, si vraye est la sentence d'Aristote, disant argument invincible d'un animant s'il se meut de soymesme. Car les chemins cheminent comme animaux et sont les uns chemins errans, à la semblance des planettes; autres chemins passans chemins croisans, chemins traversans. Et vy que les voyagiers, servans et habitans du pays demandoient ; « Où va ce chemin? et cestuy cy? » On leur respondit : « Entre Midy et Fevrolles, à la paroisse, à la ville, à la rivière. » Puis se guindans au chemin opportun, sans autrement se peiner ou fatiguer, se trouvoient au lieu destiné : comme vous voyez advenir à ceux qui de Lyon en Avignon et Arles se mettent en bateau sui le Rosne, et coinme vous savez qu'en toutes choses il y a de la faute, et rien n'est en tous endroits heureux, aussi là nous fut dict estre une manière de gens, lesquels ils nommoient guetteurs de chemins, et batteurs de pavez. Et les pauvres chemins les craignoient et s'esloignoient d'eux comme des brigands. Il les guettoient au passage, comme on fait les loups à la traînée, et les bécasses au fillet. Je vy un d'iceux, lequel estoit appréhendé de la justice, pource qu'il avait prins injustement, malgré Pallas, le chemin de l'escole, c'estoit le plus long; un autre se ventoit avoir prins de bonne guerre le plus court, disant luy estre tel advantage à ceste rencontre que premier venpit à bout de son entreprinse.

Aussi dist Carpalim à Epistemon, quelque jour le rencontrant, sa pissotière au poing, contre une muraille pissant, que plus ne s'esbahissoit si tous] ours premier estoit au lever du bon Pantagruel, car il tenoit le plus court et le moins chevauchant.

Je y recongnu le grand chemin de Bourges, et le vy marcher à pas d'Abbé, et le vy aussi fuir à la venue de quelques charretiers qui le menassoient fouUer avec les pieds de leurs chevaux, et luy faire passer les charrettes dessus le ventre, comme Tullia fit passer son charriot dessus le ventre de son père Servius Tullius, sixiesme roy des Romains.

Je y recongnu pareillement le vieux quemin de Peronne à Sainct Quentin, et me sembloit quemin de bien de sa personne.

Je y recongnu entre les rochers le bon vieux chemin de la Ferrate monté sur un grand Ours. Le voyant de loing me souvint de sainct Hierosme en pcincture, si son Ours eust esté Lyon : car il estoit tout mortifié, avoit la longue barbe toute blanche et mal peignée ; vous eussiez proprement dit que fussent glassons ; avoit sur soy force grosses patenostres de pinastre mal rabottees, et estoit comme à genoillons, et non debout, ne couché du tout, et se battoit la poitrine avec grosses et rudes pierres. Il nous fist peur et pitié ensemble. Le regardant nous tira à part un bachelier courant du pais, et, monstrant un chemin bien licé, tout blanc, et quelque peu feustré de paille, nous dist : « Dorénavant ne desprisez l'opinion de Thaïes Milesien, disant l'eau estre de toutes choses le commencement, ne la sentence d'Homère, affermant toutes choses prendre naissance de l'Océan. Ce chemin que voyez nasquit d'eau, et s'y en retournera : devant deux mois les basteaux par-cy passoient, à ceste heure y passent les charrettes.

— Vrayement, dist Pantagruel, vous nous la baillez bien piteuse ! En nostre monde nous en voyons tous les ans de pareille transformation cinq cens et davantage. »