LIVRE V, CHAPITRE XXXI
Cerchans donques par ledit pays si viandes aucunes trouverions, en entendismes un bruit strident et divers, comme si fussent femmes lavant la buée ou traquets de moulins du Bazacle lez Tolose; sans plus séjourner, nous transportasmes au lieu où c'estoit, et vismes un petit vieillard bossu, contrefait et monstrueux ; on le nommoit Ouy dire : il avoit la gueule fendue jusques aux aureilles, et dedans la gueule sept langues, et chaque langue fendue en sept parties; quoy que ce fust, de toutes sept ensemblement parloit divers propos et langages divers : avoit aussi parmy la teste et le reste du corps autant d'aureilles comme jadis eut Argus d'yeux; au reste estoit aveugle et paralytique des jambes.
Autour de luy je vy nombre innumerable d'hommes et de femmes escoutans et attentifs, et en recongnu aucuns parmy la trouppe faisans bon minois, d'entre lesquels un pour lors tenoit une mappemonde, et la leur exposoit sommairement par petits aphorismes, et y devenoient clercs et sçavans en peu d'heures, et parloient de prou de choses prodigieuses elegantement et par bonne mémoire, pour la centiesme partie desquelles sçavoir ne suffiroit la vie de l'homme : des Pyramides, du Nil, de Babylone, des Troglodites, de Hymantopopodes, des Blemmyes, des Pigmees, des Canibales, des monts Hyperborees, de ^gipanes, de tous les diables, et tout par Ouy dire.
Là je vy, selon mon advis, Hérodote, Pline, Solin, Berose, Philostrate, Mêla, Strabo, et tant d'autres antiques, plus Albert le Jacobin grand, Pierre Tesmoin, Pape Pie second, Volateran, Paulo Jovio le vaillant homme, Jacques Cartier, Chaïton Armenian, Marc Paule Vénitien, Ludovic Romain, Piètre Alvares, et ne sçay combien d'autres modernes historiens cachez derrière une pièce de tapisserie, en tapinois escrivans de belles besongnes, et tout par Ouy dire.
Derrière une pièce de velours figuré à feuilles de menthe, prés d'Owy dire, je vis nombre grand de Percherons et Man-
çeaux, bons estudians, jeunes assez : et demandans en quelle faculté ils appliquoient leur estude, entendismes que là de jeunesse ils apprenoient à estre tesmoins, et en cestuy art proufitoient si bien que, partans du lieu et retournez en leur province, vivoient lionnestement du niestier de tesmoignerie, rendans seur tesmoignage de toutes choses à ceux qui plus donneroient par journée, et tout par Ouy dire. Dictes en ce que vouldrez, mais ils nous donnèrent de leurs chanteaux, et beusmes à leurs barils à bonne chère. Puis nous advertirent cordialement, qu'eussions à espargner vérité, tant que possible nous seroit, si voulions parvenir en Court de grands seigneurs.
