COMMENT LE PAVÉ DU TEMPLE ESTOIT FAICT PAR EMBLEMATURE ADMIRABLE

Luees ces inscriptions, jettay mes yeux à la contemplation du magnifique temple, et considerois l'incredible compacture du pavé, auquel, par raison, ne peut estre ouvrage comparé quiconque, soit ou ait esté dessous le firmament, . fust-ce celuy du temple de Fortune en Preneste, au temps de Sylla; ou le pavé des Grecs, appelé Asarotiim, lequel fit Sosistratus en Pergame. Car il estoit ouvTage tesseré, en forme de petits carreaux, tous de pierres fines et polies, chascune en sa couleur naturelle : l'une de Jaspe rouge, tainct plaisamment de diverses macules; l'autre, d'Ophite; l'autre, de Porphyre; l'autre, de Licopthalme, semé de scintiles d'or, menues comme atomes ; l'autre, d'Agathe, à onde de petits flammeaux confus et sans ordre, de couleur laictée; l'autre, de Calcédoine très cher; l'autre, de Jaspe verd, avec certaines veines rouges et jaunes, et estoient en leur assiette desparties par ligne diagonale.

Dessus le portique, la structure du pavé estoit une emblemature à petites pierres rapportées, chascune en sa naïf va couleur, servans au dessein des figures, et estoit comme si par dessus le pavé susdit on eust semé une jonchée de pampre, sans trop curieux agensement. Car, en un lieu, sembloit estre espandu largement; en l'autre, moins : et estoit ceste infoliature insigne en tous endroits, mais singulièrement y apparoissoient, au demy jour, aucuns limassons, en un heu, rampans sus les raisins; en autre, petits hsars courans à travers le Pampre : en aultre apparoissoient raisins à demy, et

raisins totalement meurs, par tel art et engin de l'Architecte composez et formez qu'ils eussent aussi facilement deccu les estourneaux et autres petits oiselets que fist la peinture de Zeuxis Heracleotain ; quoy que soit, ils nous trompoient tresbien, car, à l'endroit auquel l'Architecte avoit le pampre bien espois semé, craignans nous offenser les pieds, nous marchions haut à grandes enjambées, comme on fait passant quelque lieu inégal et pierreux. Depuis, jetay mes yeux à contempler la voulte du temple avec les parois, lesquels estoient tous incrustez de marbre et porphire, à ouvrage mosaycque, avec une mirifique emblemature depuis un bout jusques à l'autre, en laquelle estoit, commençant à la part senestre de l'entrée, en élégance incroiable, représentée la bataille que le bon Bacchus gagna contre les Indians, en la manière que s'ensuit.