COMMENT ANDOUILLES NE SONT A MESPRISER ENTRE LES HUMAINS

Vous truphez ici, Beuveurs, et ne croyez que ainsi soit en vérité comme je vous raconte. Je ne sçaurois que vous en faire. Croyez le, si voulez; si ne voulez, allez y veoir. Mais je sçay bien ce que je veidz. Ce feut en l'isle Farouche. Je la vous nomme. Et vous réduisez à mémoire la force des Géants antiques, les quelz entreprindrent le hault mons Pelion imposer sus Osse, et l'umbrageux Olympe avecques Osse envelopper, pour combattre les dieux, et du ciel les deniger. Ce n'estoit force vulgaire ne médiocre. Iceulx toutesfoys n'estoient que Andouilles pour la moitié du corps, ou Serpents que je ne mente.

Le serpens qui tenta Eve estoit andouillicque : ce nonobstant est de luy escript qu'il estoit fin et cauteleux sus tous aultres animans. Aussi sont Andouilles.

Encores maintient on en certaines Académies que ce tentateur estoit l'andouille nommée Ityphalle, en laquelle feut jadis transformé le bon messer Priapus, grand tentateur des femmes par les paradis en Grec, ce sont jardins en François. Les Souisscs, peuple maintenant hardy et belliqueux, que sçavons nous si jadis estoient Saulcisses? Je n'en vouldroys pas mettre le doigt on feu. Les Himantopodes, peuple en .Ethiopie bien insigne, sont Andouilles, selon la description de Pline, non autre chose.

Si ces discours ne satisfont à l'incrédulité de vos seigneuries, présentement (j'entends après boyre) visitez Lusignan, Partenay, Vovant, Mervant, et Ponseuges en Poictou. Là trou-