DE LUY MESMES

Icy gist mort, vivant par bon renom, Jehan Cotereau, seigneur de Maintenon :

Je dy celuy chevallier estimé, Du roy Loys douziesme tant aymé, Qu'en ses trésors pouvoir luy assigna, Et aux secretz des finances signa. Je dy celuy, de vertu amateur, Qui de ce temple a esté fondateur.

Des ans vesquit près de soixante et douze. Chez luy mourut; puis enfans et espouse L'ont mis au cueur de sa fondation, Où il attend ressuscitation.

DE LUr ENCORES

Je fuz Jehan Cotereau, qui quatre Roy servy, Desquelz en bien servant la grâce desservy, Et dont fut le dernier Françoys premier du nom, Soubz qui je trespassay seigneur de Maintenon, Ayant ja servy France en son privé secret. Et en ses grans trésors, que laissay sans regret Pour venir cy attendre, en paix, de mort le jour, Où ce temple fonday pour mon dernier séjour.