EN HAINAULT

Devers Haynault, sur les fins de (]hampaigne, Est arrivé le bon duc d'Aleuçon, Avec Honneur, qui tousjours l'accompaigne Comme le sien propre et vray escusson.

Là peult on veoir sur la grand' plaine unie Des bons souldars son enseigne munie, Pretz d'employer leur bras fulminatoire A repoulser dedens leur territoire Lourds Haynuyers, gent rustique et brutale, Voulant marcher sans raison peremptoire Sur les climatz de France occidentale.

Prenez hault cueur doncques, France et Bretaigne, Car si en camp tenez fiere façon.

Fondre verrez devant vous Allemaigne, Comme au soleil blanche neige et glaçon. Fiffres, tabours, sonnez en armonie ; Advanluriers, que la picque on manye Pour les choquer et mettre en accessoire, Car desjà sont au royal possessoire.

Mais (comme croy) Destinée fatale Veult ruyner leur oultrageuse gloire Sur les climatz de France occidentale.

Doncques, piétons marchans sur la campaigne, Fouldroiez tout sans rien prendre à rançon. Preux chevaliers, puis qu'honneur on y gaigne, Vos ennemys poulsez hors de l'arson.

Faictes rougir du sang de Germanie Les clairs ruisseaux dont la terre est garnie. Si seront mis vos haults noms en histoire. Frappez donc tant de main gladiatoire Qu'après leur mort et deffaicte totale Vous rapportiez la palme de victoire Sur les climatz de France occidentale.

Princes remplyz de hault loz méritoire, Faisons les tous, si vous me voulez croire, Aller humer leur cervoise et godale.

Car de noz vins ont grand désir de boire Sur les climatz de France occidentale.