DE PAIX ET DE VICTOIRE

Quel hault souhait, quel bienheuré désir Feray je, las ! pour mon dueil qui empire? Souhaiteray je avoir dame à plaisir?

Desireray-je un règne ou un empire?

Nenny (pour vray) car celuy qui n'aspire Qu'a son seul bien, trop se peult desvoyer; Pour chascun donc à soûlas convoyer, Souhaiter veulx chose plus méritoire :

C'est que Dieu vueille en brief nous envoyer Heureuse paix ou triumpliant victoire.

Famine vient Labeur aux champs saisir; Le bras au chef soudaine mort désire; Soubz terre voy gentilz hommes gésir.

Dont mainte dame en regretant .souspire; Clameurs en faict ma bouche qui respire; Mon triste cueur l'œil en faict larmoyer; Mon foible sens ne peult plus rithmoyer Fors en dolente et pitoyable histoire; Mais Bon Espoir me promet pour loyer licurcuse paix ou triumphant victoire.

Ma plume lors aura cause et loysir Pour du loyer quelque beau lay escrire; Bon temps adonc viendra France choisir, Labeur alors changera pleurs en rire.

O que ces motz sont faciles à dire !

Ne sçay si Dieu les vouldra employer.

Cueurs endurcis (las !) il vous fault ployer. Amende toy, ô règne transitoire !

Car tes péchez pourroient bien forvoyer Heureuse paix ou triumphant victoire.

ENVOY

Prince Françoys, fais Discorde noyer; Prince Espaignol, cesse de guerroyer; Prince aux Anglois, garde ton territoire; Prince du Ciel, vueille à France octroyer Heureuse paix ou triumphant victoire.