AFFECTIONS QU'IL FAUT FAIRE APRES L'EXAMEN

APRES avoir doucement consideré chaque poinct de l'examen, et veu à quoy vous en estes, vous viendrez aux affections en cette sorte.

Remerciez Dieu de ce peu d’amendement que vous aurez treuvé en vostre vie, dés vostre resolution, et recognoissez que ç’a esté sa misericorde seule qui l’a fait en vous, et pour vous.

Humiliez-vous fort devant Dieu, recognoissant que, si vous n’avez pas beaucoup advancé, ç’a esté par vostre manquement, parce que vous n’avez pas fidellement, courageusement et constamment correspondu aux inspirations, clartez et mouvemens qu'il vous a donnez en l’orayson, et ailleurs.

Promettez-luy de le loüer à jamais des graces exercées en vostre endroict, pour vous retirer de vos inclinations à ce petit amendement.

Demandez-luy pardon de l’infidellité et desloyauté avec laquelle vous avez correspondu.

Offrez-luy vostre cœur, affin qu'il s’en rende du tout le maistre.

Suppliez-le qu'il vous rende toute fidelle.

Invoquez les Saincts, la S® Vierge, vostre ange, vostre de tron, S. Joseph, et ainsi des autres.