SECOND GENTILHOMME

Comment ! les nopces accordées ne viendrontelles point à elFect ? que dictes-vous ?

PREMIER GENTILHOMME

Le Roy Masinissa ne tiendra-il point sa promesse ? C'est bien chose estrange qu'il ait le cueur de si tost abandonner une si belle et si vertueuse dame ; car il aura assez moyen de la sauver pourveu qu'il le vueille.

DAMES

Qui n'est le plus fort, il faut qu'il baisse la teste et qu'il ait patience. Malaisément peult le subject gaigner sa cause à l'encontre de son seigneur. Le Roy ne feroit pas si triste chère s'il ne veoit les choses aller au rebours de sa volonté. Ceste pauvre Dame n'a homme qui parle pour elle et ne seauroit avoir si non mauvaise nouvelle.

PREMIER GENTILHOMME

O Dieux! qui n'a donc faveur de la Fortune ne fault pas qu'il espère avoir des amis. Les nopces à ce que je voy sont rompues.