DE TROIS ENFANS FRERES

D'un mesme dard, soubz une mesme année,

Et en trois jours de mesme destinée

Mal pestilent soubz ceste dure pierre

Meit Jehan de Bray, Bonadventure, et Pierre,

Frères tous trois : dont le plus vieil dix ans

A peine avoit. Qu'en dictes vous, Lisans ?

Cruelle mort, mort plus froide que marbre,

N'a elle tort de faire cheoir de Tarbre

Un fruict tant jeune, un fruict sans meureté ,

Dont la verdeur donnoit grandes cureté

De bien futur ? qu'a elle encore faict :

Elle a pour vray , du mesme coup deffaict

De père, et mère espérance et liesse.

Qui, s'attendoit resjouyr leur vieillesse

Avec leurs fdz : desquelz la mort soudaine

Nous est tesmoing , que la vie mondaine ,

Autant enfans, que vieillards, abandonne,

Il nous doibt plaire, et puisque Dieu l'ordonne.