DE LA CHIENNE DE LA ROYNE ELEONOR

Mignonne est trop plus affette'e, Plus frétillant , moins arrestée Que le passeron de Maupas :

Cinquante pucelles n'ont pas La mignardie si friande.

Mignonne nasquit aussi grande Quasy comme vous la voyez.

Mignonne vault ( et m'en croyez ) Un petit trésor : aussi est ce Le passe et temps et la liesse De la royne, à qui si fort plaist , Que de sa belle main la paist.

Mignonne est la petite chienne :

Et la royne , est la dame sienne :

Qui l'orroit plaindre aucunesfoys , On gageroit que c'est la voix De quelque dolente personne :

Et a bien cest esprit Mignonne , De sentir plaisir , et esmoy , Aussi bien comme vous et moy.

La royne en sa couche parée ,

Luy a sa place préparée :

Et dort, la petite foUastre,

Dessus la gorge d'allebastre

De sa dame , si doulcement

Qu'on ne l'oyt souffler nullement.

Et si pisser veult d'adventure ,

Ne gaste drapz , ny couverture :

Mais sa maistresse gratte , gratte ,

Avecques sa flatteuse patte :

L'advertissant qu'on la descende :

Qu'on l'essuyé , et puis qu'on la rende

En sa place : tant est honneste,

Et nette la petite beste.

Le' jeu d'amours n'a esprouvé :

Car encores n'avons trouvé

Un mary digne de se prendre

A une pucelle si tendre.

Or affin que du tout ne meure , Quand de mourir viendra son heure , Sa maistresse en un beau tableau , L'a faict paindre à Fontainebleau , Plus semblable à elle ( ce semble ) Qu'elle mesme ne se ressemble.