ODE XX

Si j'aime depuis naguiere Une belle chambrière, Je ne suis pas à blasmer De si bassement aimer.

Non , l'amour n'est point vilaine Que maint brave capitaine, Maint philosophe et maint roy, A trouvé digne de soy.

Hercule, dont l'honneur vole Au ciel, aima bien lole, Qui, prisonnière, dontoit Celuy qui son maistre estoit.

Achille, l'effroy de Troye, De Briseïs fut la proye , Dont si bien il s'échaufa Que, serve, elle en trionfa.

Ajax eut pour sa maistresse Sa prisonnière Tecmesse, Bien qu'il secouast au bras Un bouclier à sept rebras.

Agamemnon se vit prendre De sa captive Cassandre, Qui sentit plus d'aise au cœur D'estre veincu que veinqueur.

Le petit Amour veut estre Tousjours des plus grands le maistre,

Deuxiesme Livre. 167

Et jamais il n'a esté Compagnon de majesté.

A quoy diroy-je l'histoire De Jupiter, qui fait gloire De se vestir d'un oyseau , D'un satyre et d'un taureau,

Pour abuser nos femeiles?

Et, bien que les immortelles Soient à son commandement, Il veut aimer bassement.

Jamais on n'a que tristesses A servir ces grand's déesses :

Qui veut avoir ses esbas, Il faut aimer en lieu bas.

Quant à moy, je laisse dire Tous ceux qui veulent mesdire; Je ne veux laisser pour eux En bas lieu d'estre amoureux.