CHAPITRE XXX VIII

Comment Andouilles ne sont à mespriser entre les humains.

Vous truphez ici, buveurs, et ne croyez que ainsi soit en vérité comme je vous racompte. Je ne sçauroi que vous en faire. Croyez-le si voulez : si ne voulez, aller y voir. Mais je sçai bien ce que je vid. Ce fut en l'isle Farouche. Je la vous nomme. Et vous réduisez à mémoire la force des géants antiques, lesquels entreprindrent le haut mont Pelion imposer sus Osse, et l'umbrageux Olympe avecques Usse envelopper, pour combattre les dieux, et du ciel les déniger. Ce n'’estoit force vulgaire médiocre. Iceulx toutesfois n’estoient que andouilies pour la moitié du corps, ou serpents que je ne mente. Le serpent qui tenta Eve estoit andouillique, ce nonobstant est de lui escript, qu'il estoit fin et cauteleux sus touts aultres animants. Aussi sont andouilles. Encores maintient on .en ceriaines académies, que ce tentateur estoit l’andouille nommée Ithyphalle, en laquelle fut jadis transformé le bon messer Priapus, grand tentateur des femmes par les paradis en grec, ce sont jardins en françois. Les Souisses, peuple maintenant hardi et belliqueux, que sçavons-nous si jadis estoient saulcisses ? Je n’en vouldroi pas mettre le doigt on feu. Les Himantopodes, peuple en Ethiopie bien insigne, sont andouilles selon la description de Pline : non aultre chose. Si ces discours ne satisfont à l'incrédulité de vos seigneuries, présentement (j’entend après boire) visitez Lusignan, Partenay, Vouant, Mervant, et Ponzauges en Poictou. Là trouverez tesmoings vieulx de renom et de la bonne forge, lesquels vous jureront sus le bras sainct Rigomé, que Mellusine, leur première fondatrice, avoit corps féminin jusques aulx boursavits, et que le reste en bas estoit andouille serpentine, ou bien serpent andouillique. Elle toutefois avoit allures braves et galantes, lesquelles encore aujourd'hui sont imitées par les Bretons balladins dansants leurs trioris fredonnisés. Quelle fut la cause pourquoi Erichthonius premier inventa les coches, lectières, et charriots? C’estoit parce que Vulcan l'avoit engendré avecques jambes d'andouilles : pour lesquelles cacher, mieux aima aller en lectière qu'à cheval. Car encores de son temps n'estoient andouilles en réputation. La nymphe scythique Ora avoil pareillement le corps mi-parti en femme et en andouille. Elle toutesfois tant sembla belle à Jupiter, qu'il coucha avecques elle et en eut un beau fils nommé Colaxes. Cessez pourtant ici plus vous trupher!, croyez qu'il n'est rien de si vrai que l'Evangile.