CHAPITRE LVI
Comment, entre les paroles gelées, Pantagruel trouva des mots de gueule.
Le pilot feit response : « Seigneur, de rien ne vous effrayez. lei est le confin de la mer glaciale, sus laquelle fut au commencement de l’hyver dernier passé grosse et félonne bataille, entre les Arimaspiens et les Nephelibates, lors gelarent en l’aer les paroles et cris des hommes et femmes, les chaplis des masses, les hurtis des harnois, des bardes, les hannissements des chevaulx et tout aultre effroi de combat. A ceste heure, la rigueur de l’hyver passée, advenente la sérénité et tempérie du bon temps, elles fondent et sont ouïes. — Par Dieu, dist Panurge, je l’en croi. Mais en pourrionsnous voir quelqu'une. Me soubvient avoir leu que, l’orée de la montagne en laquelle Moses receut la loi des Juifs, le peuple voyoit les voix sensiblement. — Tenez, tenez, dist Pantagruel, voyez en ci qui encores ne sont desgelées. »
Lors nous jecla sus le tillac pleines mains de paroles gelées, et sembloient dragée perlée de diverses couleurs. Nous y vismes des mots de gueule, des mots de sinople, des mots d'azur, des mots de sable, des mots dorés. Lesquels estre quelque peu eschauffés entre nos mains fondoient comme neiges, et les oyons réalement ; mais ne les entendions. Car c’estoit langage barbare. Exceplé un assez grosset, lequel ayant frère Jean eschauffé entre ses mains, feit un son tel que font les chastaignes jectées en la braze sans estre entommées lors que s’esclatent, et nous feit touts de paour tressaillir. « C’estoit, dist frère Jean, un coup de faulcon en son temps. » Panurge requist Pantagruel lui en donner encores. Pantagruel lui respondit qué donner paroles estoit acte de amoureux. « Vendez m'en donc, disoit Panurge. — C’est acte d'advocats, respondit Pantagruel, vendre paroles. Je vous vendrois plustost silence et plus chèrement, ainsi que quelques fois la vendit Demosthenes moyennant son argentangine. »
Ce nonobstant il en jecta sus le tillac trois ou quatre poignées. Et y vid des paroles bien piquantes, des paroles sanglantes, lesquelles le pilot nous disoit quelquefois retourner on lieu duquel estoient proférées, mais c'estoit la gorge coupée; des paroles horrifiques, et aultres assez mal plaisantes à voir. Lesquelles en-
semblement fondues, ouismes : « Hiu, hin, hin, hin, his, tique, torche, lorgne, hrededin, brededac, frr, frrr, frrr, bou, bou, bou, bou, bou, bou, bou, bou, tracc, tracc, trr, trr, trr, trer, trrrrrr, on, on, on, on, on, ououououon, goth, magoth!» et ne sçai quels aultres mots barbares, et disoit que c’estoient vocables du hourt et hannissement des chevaulx à l'heure qu'on choque : puis en ouismes d'aultres grosses, et rendoient son en dégelant, lés unes comme de tabours, et fifres, les aultres comme de clairons et trompettes. Croyez que nous y eusmes du passelemps beaucoup. Je voulois quelques mots de gueule mettre en réserve dedans de l'huile comme l’on garde la neige et la glace, et entre du feurre bien net. Mais Pantagruel ne le voulut, disant estre folie faire réserve de ce dont jamais l'on n'ha faulte, et que tousjours on ha en main, comme sont mots de gueule entre touts bons et joyeux pantagruélistes. Là Panurge fascha quelque peu frère Jean, el le feit entrer en resverie; car il le vous print au mot, sus l'instant qu'il ne s’en doubtoit mie , et frère Jean menacça de l'en faire repentir en pareille mode que se repentit Guillaume Jousseaulme (1) vendent à son mot le drap au noble Patelin, et, advenent qu'il fut marié, le prendre aulx cornes, comme un veau : puis qu'il l'avoit prins au mot comme un homme. Panurge lui feit la babou, en signe de dérision. Puis s’escria, disant : « Plust à Dieu qu'ici, sans plus avant procéder, j'eusse le mot de la dive bouteille! »
