CHAPITRE XLIV

Comment le moine se deffeit de ses gardes, et comme l’escarmouche de Picrochole fut deffaicte.

Le moine, les voyant ainsi départir en désordre, conjectura qu'ils alloient charger sus Gargantua et ses gents, el se contristoit merveilleusement de ce qu’il ne les povoit secourir. Puis advisa la contenence de ses deux archers de garde, lesquels eussent voluntiers couru après la troupe pour y butiner quelque chose, et tousjours regardoient vers la vallée en laquelle ils descendoient. D'advantage syllogisoit disant : « Ces gents ici sont bien. mal exercés en faicts d'armes : car onques ne m'ont demandé ma foi, et ne m'ont osté mon braquemart. »

Soubdain après tira son dict braquemart, et en ferut l’archer qui le tenoit à dextre, lui coupant entièrement les veines jugulaires et artères sphagitides du col, avec le gargaréon, jusques és deux adènes : et retirant le coup, lui entre-ouvrit la mouelle spinale entre la seconde et tierce vertèbre : là tomba l’archer tout mort. Et le moine destournant son cheval à ‘gausche courut sus l’aultre, lequel voyant son compagnon mort, et le moine advantagé sus soi, crioit à haulte voix : « Ha! monsieur le priour, je me rends, monsieur le priour, mon ami, monsieur le priour. » Et le moine crioit de mesme. « Monsieur le posteriour, mon ami, monsieur le posteriour, vous aurez sus vos postères. — Ha! disoit l’archer, monsieur le priour, mon mignon, monsieur le priour, que Dieu vous face

abbé. — Par l’habit, disoit le moine, que je porte, je vous ferai ici cardinal. Rançonnez-vous les gents de religion ? vous aurez un chapitre rouge à ceste heure de ma main. — Et l'archer crioit : monsieur le priour, monsieur le priour, monsieur l’abbé futur, monsieur le cardinal, monsieur le tout. Ha, ha, hes! non, monsieur le priour, mon bon petit seigneur le priour, je me rends à vous. — Et je te rends, dist le moine, à touts les diables. »

Lors d’un coup lui tranchit la teste, lui coupant le test sus les os pétreux, et enlevant les deux os bregmatis, et la commissure sagiltale, avec grande partie de l'os coronal, ce que faisant lui tranchit les deux méninges, et ouvrit profundement les deux postérieurs ventricules du cerveau : et demoura le crane pendant sus les espaules à la peau du péricrane par derrière, en forme d’un bonnet docloral noir par dessus, rouge par dedans. Ainsi tomba roide mort en terre. Ce faict, le moine donne des esperons à son cheval, et poursuit la voie que tenoient les ennemis, lesquels avoient rencontré Gargantua et ses compagnons au grand chemin : et tant estoient diminués en nombre pour l'énorme meurtre qu'y avoit faict Gargantua avec son grand arbre, Gymnaste, Ponocrates, Eudemon et les autres, qu'ils commenceoient soi retirer à diligence, touts eflrayés et perturbés de sens et entendement, comme s'ils vissent la propre espèce et forme de mort devant leurs yeulx. Et comme vous voyez un asne, quand il ha au cul un œstre junonique, ou une mousche qui le poinct, courir ça et là sans voie ni chemin, jectant sa charge par terre, rompant son frein et rènes, sans auculnement respirer ni prendre repos, et ne sçait on qui le meut (car l’on ne veoit rien qui le touche) : ainsi fu yoient ces gents de sens despourvus, sans sçavoir cause de fuir : tant seulement les poursuit une terreur panice laquelle avoient conceue en leurs ames. Voyant le moine que toute leur pensée n'’estoit sinon à gagner au pied, descend de son cheval, et monte sus une grosse roche qui estoit sus le chemin, et avec son grand braquemart, frappoit sus ces fuyars à grand tour de bras sans se feindre ni espargner. Tant en tua et mist par terre, que son braquemart rompit en deux pièces. Adoncques pensa en soi mesme que c’esloit assez massacré et tué, et que le reste debvoit eschaper pour en porter les nouvelles. Pourtant saisit en son poing une hasche de ceux qui là gisoient morts, et se retourna derechef-sus la roche, passant temps à voir fuir les ennemis, et cullebuter entre les corps morts, excepté qu’à touts faisoit laisser leurs piques, espées, lances, et haquebules . et ceulx qui portoient les pélerins liés, il les mettoit à pied et délivroit leurs chevaux auxdicts pélerins, les retenant avec soi l'orée de la haye; et Toucquedillon, lequel il retint prisonnier.