DE FRANCE ET D ANGLETERRE

leur père, par droite succession, sans avoir hoir masle de leurs chars engenrés par léal mariage. Che biau roy Phelippes de son vivant ot gherre durant en Flandres et maria sa fille , qui s'apelloit Ysabel, au roy Edouart d'Angleterre , fil au bon roy Edouart. Chils roy Édouart , de ceste dame , fille au biel roy Phelippe , ot deus fieus et deus filles. Li aisné fils ot non Édouart de Windesor ; le second, Jehan de Eltem. Il mourutjone. Ly aisnée des filles , Ysabel , ot espousé le roy David de Escoche. Ly seconde qui ot non Marie, ot le duc de Gherles nommé Renault.

Or avint que quant chil trois fils du biel roy Phelippe furent mors , ly uns après l'autre , sans avoir hoir masle de leur char par léal raariaige , après le mort du darain roy qui ot non Charles , ly douze pers de France ne donnèrent point le royaulme à leur sereur qui estoit roine d'Angleterre , pour tant qu'il voloient dire , et maintenir encores voellent , que le royaulme de France est bien sy noble que il ne doit mie aler, ne descendre à fumelle , ne conséquemment à fil de fumelle. Car, ensy que il voellent dire, ne maintenir, ly fieuls de fumelle ne peult avoir droit , ne succession , de par se mère, venant là où sa mère n'a point de droit, syque par ces raisons ly douze pers et ly barons de Franche donnèrent de leur commun accort à monsigneur Phelippe de Vallois , fils jadis à monsigneur Charles , conte de Valois , et frère du biel roy Phelippe , le royaulme et l'irtaige de France , et le couronnèrent roy, et en estèrent la roynne d'Angleterre et son fils qui estoit lioirs masles et nepveu au roy Charles , par laquelle succession ly royaulme leur appartenoit , et consentirent ce à Phelippe de Valois qui n'estoit que cousin germain. C'est le point et le certains articles pour quoy les guerres et les tribulations ont esté en France, ensy que vous orés esclarchir chy-après par manière de croniques.