ILZ DEMOUROIENT SANS SEPULTURE

Et quant tout lappareil estoit mis sus, lors le soixante et treizeiesme jour, le corpz posé en une sumptueuse arche estoit mis a lentrée de son sepulchre Royal. Illec selon leur coustume estoient recitez en brief les gestes du feu Roy, et estoit donnée faculté a ung chascun dy pouoir contredire ou de laccuser daucune faulte. Les prestres estoient là entour qui louoient et exaulsoient les bienfaictz du Roy, le peuple iramemorable (1) estant présent a lenuiron applaudissoit aux vrayes louenges, et à ce quil luy sembloit non véritable, mais de par flaterie, il contredisoit par grant bruyt et tumulte. Dont il aduenoit aucunefoys que les Royz et princes par linportunité du peuple contrariant, estoient priuez et frustrez de leur honneur de sépulture et magnificence acoustumee. Et ceste crainte contraignit les Royz dEgipte a viure justement, doubtans après leur mort lire (2) future du peuple et la hayne sempiternelle. Aussi ceulx qui auoient bien vescu, estoient honnorez de sépulcres de celle estimation que les Laberinthes inextricables et les pyramides de merueilleux labeur et haultesse qui sont ediffices de despense increable en font foy jusques a présent, car ilz ont estez nombrez entre les plus grandes merueilles dhumain artiflâce.

(1) Qui ne mérite pas d'être rappelé à la mémoire? (Ou bien innumérable t)

(2) Ira, la colère.