COMMENT FEUST BASTIE ET DOTEE L ABBAYE DES THELEMITES
Pour le bastiment et assortiment de l'abbaye, Gargantua feist hvrer de content vingt et sept cent mille huyt cent trente et un mouton à la grand laine, et, par chascun an, jusques à ce que le tout fcust parfaict, assigna, sur la recepte de la Dive, seize cent soixante et neuf mille escuz au soleil, et autant à l'estoille poussiniere. Pour la fondation et entretenement d'icelle, donna à perpétuité \dngt trois cent soixante neuf mille cinq cens quatorze nobles à la rose, de rente fon-
ciere, indemnez, amortiz et solvables par chascun an à la porte de l'abbaye, et de ce leurs passa belles lettres.
Le bastiment feut en figures exagone, en telle façon que à chascun angle estoit bastie une grosse tour ronde, à la capacité de soixante pas en diamètre, et estoient toutes pareilles en grosseur et protraict. La rivière de Loire descoulloit sus l'aspect de septentrion. Au pied d'icelle estoit une des tours assise, nommée Arctice, et tirant vers l'Orient estoit une aultre, nommée Calaer; l'aultre ensuivant, Anatole; l'aultre après, Mesembrine; l'autre après, Hesperie; la dernière, Cryere. Entre chascune tour estoit espace de troys cens douze pas. Le tout basty à six estages, comprenant les caves soubz terre pour un. Le second estoit voulté à la forme d'une anse de panier; le reste estoit embrunché de guy de Flandres à forme de culz de lampes, le dessus couvert d'ardoize fine, avec l'endoussure de plomb à figures de petitz mannequins, et animaulx bien assortiz et dorez, avec les goutieres qui yssoient hors la muraille, erftre les croyzées, pinctes en figure diagonale de or et azur, jusques en terre, où finissoient en grands eschenaulx, qui tous conduisoient en la rivière par dessoubz le logis.
Ledict bastiment estoit cent foys plus magnificque que n'est Bonivet, ne Chambourg, ne Chantilly : car en icelluy estoient neuf mille troys cens trente et deux chambres, chascune guarnie de arrière chambre, cabinet, guarde robbe, chapelle, et yssue en une grande salle. Entre chascune tour, au miUeu dudict corps de logis, estoit une viz brisée dedans icelluy mesmes corps, de laquelle les marches estoient part de porphyre, part de pierre Numidicque, part de marbre serpentin, longues de xxii piedz; l'espesseur estoit de troys doigtz, l'assiete par nombre de douze entre chascun repous. En chascun repous estoient deux beaux arceaux d'antique par lesquelz estoit repceu la clarté, et par iceulx on entroit en un cabinet faict à claire voys, de largeur de ladicte viz. Et
montoit jusques au dessus la couverture, et là finoit en pavillon. Par icelle viz on entroit de chascun cousté en une grande salle, et des salles es chambres.
Depuis la tour Arctice jusqu'à Cryere estoient les belles grandes librairies en Grec, Latin, Hebrieu, François, Tuscan et Hespaignol, disparties par les divers estaiges selon iceulx langaiges.
Au mylieu estoit une merveilleuse viz, de laquelle l'entrée estoit par le dehors du logis en un arceau large, de six toizes. Icelle estoit faicte en telle symmetrie et capacité que six hommes d'armes, la lance sur la cuisse, povoient de front ensemble monter jusques au dessus de tout le bastiment.
Depuis la tour Anatole jusques à INIesembrine estoient belles grandes galleries, toutes pinctes des antiques prouesses, histoires et descriptions de la terre. Au milieu estoit une pareille montée et porte comme avons dict du cousté de la rivière. Sus icelle porte estoit escript en grosses lettres antiques ce que s'ensuit :
