COMMENT THAUMASTE RACOMPTE LES VERTUS ET SÇAVOIR DE PANURGE
Adoncques se leva Thaumaste, et, estant son bonnet de la teste, remercia ledict Panurge doulcement. Puis dist à haulte voix à toute l'assistance : « Seigneurs, à ceste heure puis je bien dire le mot evangelicque : Et ecce plusquam Salomon hic.
Vous avez icy un thresor incomparable en vostrc présence, c'est monsieur Pantagruel, duquel la renommée me avoit icy attiré du lîn fond de Angleterre, pour conférer avecques luy des problesmes insolubles tant de Magie, Alchymie, de Caballe, de Géomantie, de Astrologie, que de Philosophie, lesquelz je avoys en mon esprit. Mais, de présent, je me courrouce contre la renommée, laquelle me semble estre envieuse contre luy, car elle n'en raporte la miliesme partie de ce que en est par efficace.
« Vous avez veu comment son seul disciple me a contenté, et m'en a plus dict que n'en demandoys; d'abundand m'a ouvert et ensemble solu d'aultres doubtes inestimables. En quoy je vous puis asseurer qu'il m'a ouvert le vrays puys et abysmes de Encyclopédie, voire en une sorte que je ne pensoys trouver homme qui en sceust les premiers elemens seulement : c'est quand nous avons disputé par signes, sans dire mot ny demy. Mais à temps je redigeray par escript ce que avons dict et résolu, affin que l'on ne pense que ce ayent esté mocqueries, et le feray imprimer, à ce que chascun y appreigne comme je ay faict. Dont povez juger ce que eust peu dire le maistre, veu que le disciple a faict telle prouesse ; car 7ion est discipulus super magistrum. En tous cas.. Dieu soit loué ! et bien humblement vous remercie de l'honneur que nous avez faict à cest acte. Dieu vous le rétribue éternellement ! »
Semblables actions de grâces rendit Pantagruel à toute l'assistance, et, de là partant, mena disner Thaumaste avecques luy; et croyez qu'ilz beurent à ventre desboutonné (car en ce temps là on fermoit les ventres à boutons, comme les colictz de présent, jusques à dire : Dont venez vous? Saincte dame ! comment ilz tiroyent au chevrotin ! et flaccons d'aller, et eulx de corner : <; Tyre, baille, paige, vin; boutte, de par le diable, boutte. » Il n'y eut cellu^^ qui ne beust \'ingt cinq ou trente muys. Et sçavez comme? sicut terra sine aqua, car il faisoit chauld, et d'advantaige se estoient altérez.
Au regard de l'exposition des propositions mises par Thaumaste, et significations des signes desquelz ilz usèrent en disputant, je vous les exposeroys selon la relation d'entre eulx mesmes; mais l'on m'a dict que Thaumaste en feist un grand livre imprimé à Londres, auquel il declaire tout sans rien laisser ; par ce je m'en déporte pour le présent.
