DES RESSENTIMENS QU'IL FAUT GARDER APRES CET EXERCICE

Ce jour que vous aures fait ce renouvellement et les autres suivans, vous deves fort souvent redire de cœur et de bouche ces ardentes paroles de saint Paul, de saint Augustin, de sainte Catherine de Gennes et autres : Non, je ne suis plus mienne, ou que je vive ou que je meure, je suis a mon Sauveur ; je n'ay plus de moy ni de mien : mon moy, c'est Jésus, mon mien, c'est d'estre sienne ; o monde, vous estes tous-jours vous mesme, et moy j'ay tous-jours esté moy mesme, mais doresnavant je ne seray plus moy mesme. Non, nous ne serons plus nous mesmes, car nous aurons le cœur changé, et le monde qui nous a tant trompés sera trompé en nous, car ne s'appercevant pas de nostre changement que petit a petit , il pensera que nous soyons tous-jours des Esaû, et nous nous treuverons des Jacob.

Il faut que tous ces exercices reposent dans le cœur, et que nous ostans de la considération et méditation nous allions tout bellement entre les affaires et conversations, de peur que la liqueur de nos resolutions ne s'espanche soudainement, car il faut qu'elle détrempe et pénètre bien par toutes les parties de l'ame, le tout néanmoins sans effort ni d'esprit ni de cors.

Cinquiesme Partie. Chapitre xvii. 363