PRIVILEGE DU ROY

Henry par la grâce de Dieu Roy de France et de Navarre, A nos amés et féaux Conseillers tenans nos Cours de Parlemens, Baillifs, Seneschaux, et tous nos autres Juges et Officiers Salut; Nostre bien aymé Pierre Rigaud, Marchand Libraire de nostre Ville de Lyon, nous a faict remonstrer, qu'on luy a mis en main pour mettre en lumière un livre non encores imprimé, qui s'intitule Introduction a la vie dévote, Composé par François de Sales, Evesque et Prélat de Genève ; lequel livre ledit exposant voudroit volontiers imprimer pour le bien et contentement de nos subjects. Mais il craint que quelque autre ne le vouleut imprimer ou faire imprimer, après qu'il aura faict beaucoup de despence pour le mettre au net en l'imprimant bien et correctement ; Nous requérant sur ce nos lettres de permission et Privilège; A ces causes inclinant liberallement à l'humble requeste dudict exposant, luy avons permis imprimer ledit livre; Et pour le garantir des fraiz et peine qu'il luy convient suporter, deffendu et deffendons à tous nos autres Imprimeurs, marchands Libraires, et à tous nos autres subjets de quelque qualité et condition qu'ils soient, d'imprimer ou faire imprimer, vendre ou distribuer en iceluy nostre Royaume, pays et Terre de nostre obéissance ledit livre de six ans finis et acomplis après la première Impression faicte par ledit exposant, à peine de cinq cens livres d'amende, applicable moitié à nous, et l'autre moitié audit exposant, et confiscation de tous exemplaires qui se treuveront estre imprimés par autre que par ledit Rigaud. Voulons aussi que ces présentes contenant nostre permission et Privilège soient tenu pour suffisamment signifié, pourveu que ledit exposant en face imprimer l'estraict sommaire au commencement ou à la fin de chacun exemplaire dudit livre. Si vous mandons, et à chacun de vous endroict soy commettons que de nos présentes grâces, congé, permission, et du contenu cy dessus vous faites et laissiez jouir ledit Rigaud, et ceux qui auront droict de luy, cessans ou faisant cesser tous troubles au contraire ; Et en outre mandons au premier nostre Huissier, ou Sergent sur ce requis faire tous exploicts nécessaires pour l'exécution de ces présentes, sans demander placet, visa, nepareatis. Car tel est nostre Plaisir; Nonobstant oppositions ou appellations quelconques, clameur de haro, chartre Normande, coustume de pays, et autres choses à ce contraires. Donné à Paris ce x. jour de Novembre, l'an de grâce, mil six cens huict, et de nostre Règne le vingtiesme.

Par le Roy en son Conseil,

BERGENRON.