CHAPITRE XI
DE LA PERPLEXITÉ DU CœUR QUI AYME SANS SÇAVOIR QU'iL PLAIT AU BIENAYMÉ
Le chantre duquel j'ay parlé, estant devenu sourd, n'avoit nul contentement a chanter que celuy de voir aucunefois son prince attentif a l'ouïr et y prendre playsir. O que bienheureux est le cœur qui ayme Dieu sans aucun autre playsir que celuy qu'il prend de plaire a Dieu ! car, quel playsir peut-on jamais avoir plus pur et parfait que celuy que l'on prend dans le playsir de la Divinité ? Néanmoins, ce playsir de plaire a Dieu n'est pas a proprement parler l'amour divin, ains seulement un fruit d'iceluy, qui en peut estre séparé ainsy qu'un citron de son citronnier. Car, comme j'ay dit, nostre musicien chantoit tous-jours sans tirer aucun playsir de son chant, puisque la surdité l'en empeschoit ; et maintefois il chantoit aussi sans avoir le playsir de plaire a son prince, parce que le prince, luy ayant commandé de chanter, se retiroit ou alloit a la chasse, sans prendre ni le loysir ni le playsir de l'ouïr.
Tandis, o Dieu, que je voy vostre douce face qui tesmoigne d'aggreer le chant de mon amour, helas, que je suis consolé ! car, y a-il aucun playsir qui égale le playsir de bien plaire a son Dieu ? Mais quand vous retires vos yeux de moy et que je n'apperçois plus la douce faveur de la complaysance que vous prenies en mon cantique, vray Dieu, que mon ame est en grande peyne ! mais sans cesser pourtant de vous aymer fidèlement et de chanter continuellement l'hymne de sa dilection , non pour aucun playsir qu'elle y treuve, car elle n'en a point, ains chante pour le pur amour de vostre volonté.
144 Traitté de l'Amour de Dieu
On a veu tel enfant malade manger courageusement, avec un incroyable degoust, ce que sa mère luy donnoit, pour le seul désir qu'il avoit de la contenter; et alhors il mangeoit sans prendre aucun playsir en la viande, mais non pas sans un autre playsir plus estimable et relevé, qui estoit le playsir de plaire a sa mère et de la voir contente. Mais l'autre, qui sans voir sa mère, pour la seule connoissance qu'il avoit de sa volonté, prenoit tout ce qu'on luy apportoit de sa part, il mangeoit sans aucun playsir ; car il n'avoit ni le playsir de manger, ni le contentement de voir le playsir de sa mère, ains mangeoit simplement et purement pour faire la volonté d^icelle. La seule satisfaction d'un prince présent, ou de quelque personne fortement aymee, fait délicieuses les veillées, les peynes, les sueurs, et rend les hazards désirables : mais il n'y a rien de si triste que de servir un maistre qui n'en sçait rien, ou s'il le sçait ne fait nul semblant d'en sçavoir gré ; et faut bien, en ce cas la, que l'amour soit puissant, puisqu^il se soustient luy seul, sans estre appuyé d'aucun playsir ni d'aucune prétention.
Ainsy arrive-il quelquefois, que nous n'avons nulle consolation es exercices de l'amour sacré, d'autant que, comme chantres sourds, nous n'oyons pas nostre propre voix ni ne pouvons jouir de la suavité de nostre chant ; ains au contraire, outre cela, nous sommes pressés de mille craintes, troublés de mille tintamarres que l'ennemy fait autour de nostre cœur, nous suggérant que peut estre ne sommes-nous point aggreables a nostre Maistre et que nostre amour est inutile, ouy mesme qu'il est faux et vain, puisqu'il ne produit point de consolation. Or alhors, Theotime, nous travaillons non seulement sans playsir, mais avec un extrême ennuy, ne voyans ni le bien de nostre travail, ni le contentement de Celuy pour qui nous travaillons.
Mays ce qui accroist le mal en cette occurrence, c'est que l'esprit et suprême pointe de la rayson ne nous peut donner aucune sorte d'allégement ; car cette pauvre portion supérieure de la rayson, estant toute environnée
