L'IMPRIMEUR AUX IMPRIMEURS

Si chascun de nous taschoit, pour l'ampliment et perfection de nostre art , de faire de mieulx en mie'ulx, et non, corrompu de l'espérance du gaing, d'aller par la trace d'autruy, nous n'aurions si mauvais bruyt aujourd'huy que nous avons de faire ouvraiges incorrectz. J'entens, pour mieulx le vous declairer, que nous sommes si addonnez au profit indeu que, incontinent que l'un de nous ha mis quelque belle œuvre en avant, il est par l'autre incontinent refaict : refaict (dis-je) le plus souvent avec mille faultes ; et à ce moyen demeure celuy qui en avoit premièrement prins la peine frustré de son labeur, pour autant qu'en vendant les meschans ouvraiges, ne se expédient les bons : à cause du vil pris ou accourent les indoctes, ne sachans que c'est. Et le pis que je y voy, c'est que la faulte advient aux livres nouveaulx le plus souvent , desquelz à juste cause celuy qui premier les met en lumière devroit retirer le profit sans y estre retardé ny empesché. Donc, quant à moy, j'ay délibéré de tenir en mon imprimerie ceste mode, qu'il n'y sera imprimé aucun livre nouveau, qui ayt esté premièrement imprimé par autre, que premier celuy n'ayt retiré le loyer et profit de ses peines et despenses. Si prie tous autres de nostre art qu'ilz veulent tenir ceste façon de faire et l'observer diligemment, attendu que ce sera bien faict , et cause que chascun aura ses gaingz et profitz comme il appartiendra.