CHAP. XXXVII

Conment le messagier aporta la fausse lettre au roy d'Escoche qui estoit en Franche.

Quant ceste lettre fu escripte et resaellee du proppre seel dont l'autre avoit esté seellee, la damme le remist en la boiste du messagier, qui se dormoit tellement que oncques ne s'en perchupt. Et puis s'en alla couchier jusques a l'endemain, que le message se leva qui ja estoit hors de vin, tous esbahis dont il venoit ensi en la gharderobe de la roynne, et se doubta d'aucune chose. Mais quant il eult reghardé en sa boiste et que il eult veu sa lettre, il se contenta, et quida que on lui euwist fait cest honneur pour les bonnes nouvelles que il portoit. La ro>nne, qui ja estoit esvillie, se leva et vint au message, auquel elle enjoindy que il ne laissast pour riens que il ne revenist par elle, quant il retourneroit de Franche. Car elle desiroit savoir conment les besoignes de son fils se portoiient. Et il lui promist que ensi le feroit, si se parti a tant de la damme