SCENE PREMIÈRE

GILLET tout seul.

MAIS ne voicy pas vn grand malheur ; nos beuuettes ont esté entrerompue en l'hostellerie par la soudaine arriuéc du sire Benard, père de mon maistre : i'ay pensé en me dérobant d'en venir icy aduertir dame Jacqueline : mais comment le pourray-ie dire aussi à mon maistre ? O Fortune, que tes faicts sont merueilleux, qui as choisy ce iour malencontreux pour faire venir cestui-cy de Mets, pais si loingtain, à fin que pour sa bienuenue, on luy die de si plaisantes nouuelles de son fils et qu'il vienne empescher nostre collation, qui est pis que tout. Mais le voicy desia auec son seruiteur, il y aura bien tantost à crier : mais de quoy me souciay-ie ? à eux le débat. Ce pendant ie m'en retourne trouuer mon compaignon que i'ay laissé audict lieu, laissant passer les plus chargez.