Le ms 5027 s'arrête ici

de la cité et d'oultre petit pont, au Palais, excepté seulement leurs espées, sur paine d'estre tenuz et réputez pour traistres ; et ainsi fut fait de la plus grant partie de tous les habitants de lad. ville. Et aussi fut ordené de par le Roy que toutes les chayennes d'icelle ville fussent ostées et portées ou chastel du bois de Vincennes, et toutes les barrières qui estoient par lad. ville fussent abatues et arses sur les lieux où elles estoient faites, pour ce qu'elles avoient esté faites, ou une grant partie d'icelles, en enforcissant ' la ville contre le Roy et contre ses gens.

Et ainsi fut fait : et ne demoura en la ville chaienne ne barrière dont il ne fust ordené par la manière dessusdite. Fut aussi ordené de par le Roy que la porte ancienne Saint Anthoine et toute la muraille du travers de la rue seroit abatue et arrasée et que, en la bastide neuve qui avoit esté faite, seroit fait un chastel pour le Roy, pour avoir entrée et yssue en la ville toutes les fois qu'il lui plairoit, pour ce que ceulx de la ville avoient tenu les portes closes contre le Roy et ses gens, et empeschié pluseurs fois le charroy et sommage du Roy, du duc de Bourgongne et de pluseurs des officiers du Roy. Et aussi fut ordené que devers le Louvre, au bout des murs qui sont sur la rivière, sur les fossez de la ville, seroit faite une bastide, et une tour, qui y estoit, enforciée, affin que le Roy et ses gens eussent l'entrée et l'issue de ce cousté toutesfois qu'il leur plairoit. Et furent mis gens d'armes et arbalestriers en garnison tant en lad. bastide de S' Anthoine comme en celle devers le Louvre.