CHANT ROYAL, DE LA CONCEPTION

Lorsque le Roy par hauJt désir et cure

Délibéra d'aller vaincre ennemys,

Et retirer de leur prison obscure

Ceulx de son Ost à grans tourmens submis,

Il envoya ses Fourriers en Judée

Prendre logis sur place bien fondée;

Puis commanda tendre en forme facile

Un pavillon pour exquis domicile,

Dedans lequel dresser il proposa

Son lict de Camp, nommé en plein Concile

La digne couche où le Roy reposa.

Au Pavillon fut la riche paincture, Monstrant par qui noz péchez sont remis :

C'estoit la nue, ayant en sa closture Le jardin clos à tous humains promis, La grand'cité des haults cieulx regardée.

Le lys royal, l'olive collaudée, Avec la tour de David, immobile, Pourquoy l'ouvrier * sur tous le plus habile En lieu si noble assit et apposa (Mettant à fin le dict de la Sibylle) La digne couche où le Roy reposa.