RONDEAU III

Se mon propos vient à contraire, Certes, je l'ay bien desservy, Car je congnois que j'ay failly Envers ce que devoye plaire.

Mais j'espoire que débonnaire Trouveray sa grâce et mercy ; Se mon propos vient à contraire, Certes, je l'ay bien desservy.

Je vueil endurer et me taire, Quant cause sui de mon soucy ; Las ! je me sens en tel party Que je ne sçay que pourray faire Se mon propos vient à contraire.

Par le pourchas du regard de mes yeulx, En vous servant, ma tresbelle maistresse, J'ay essayé qu'est plaisir et tristesse,

Dont i'ay trouvé maint penser ennuyeux.

Mais de cellui que j'amoye le mieulx, N'ay peu avoir qu'à petite largesse.

Par le pourchas du regard de mes yeulx, En vous servant, ma tresbelle maistresse.

Car pour un jour qui m'a esté joyeux, J'ay eu trois moys la fièvre de Destresse; Mais Bon Espoir m'a guery de liesse Qui m'a promis de ses biens gracieux, Par le pourchas du regard de mes yculx.

Prenez tost ce baisier, mon cueur, Que ma maistresse vous présente, La belle, bonne, jeune et gente, Par sa tresgrant grâce et doulceur.

Bon guetferay, sus mon honneur, Affin que Dangier rien n'en sente.

Prenez tost ce baisier, mon cueur Que ma maistresse vous présente.

Dangier toute nuit en labeur A fait guet, or gist en sa tente ; Acomplissez brief vostre entente, Prenez tost ce baisier, mon cueur.