CHANSON XIX

Ne hurtez plus à l'uis de ma Pensée , Soing et Soucy, sans tant vous travailler, Car elle dort et ne veult s'esveiller ; Toute la nuit en paine a despensée.

En dangier est, s'eile n'est bien pensée,

CHANSONS. l5

Cessez, cessez, laissez la sommeiller.

Ne hurtez plus à l'uis de ma pensée , Soing et Soucy, sans tant vous traveiller.

Pour la guérir Bon Espoir a pensée Medicine qu'a fait apareiller ; Lever ne peut son chief de l'oreiller Tant qu'en repos se soit recompensée ; Ne hurtez plus à l'uis de ma pensée.

Ma seule, plaisant, doulce joye, La maistresse de mon vouloir, J'ay tel désir de vous véoir, Que mander ne le vous sauroye.

Helas! pensez que ne pourroye , Aucun bien , sans vous, recevoir, Ma seule, plaisant, doulce joye , La maistresse de mon vouloir.

Car, quant Desplaisir me guerroyé Souventeffois , de son povoir, Et je vueil reconfort avoir, Espérance vers vous m'envoye, Ma seule, plaisant, doulce joye.