VII (1). — COMPLAINTE

GE: à vous fais ceste clamour Pour le bon samblant et l’amour Que vous m'avez moustré toudis De vo grace en fais et en dis,

Et aussi que vous me deïstes, Quant secretaire me feiïstes,

Com nobles princes et entiers, Que vous m'aideriés volentiers,

Se j'avoie neccessité.

Pour ce vous diray verité.

Sire, il est voirs comme evangile Que li contes de Tanquarville M'envoia une haguenée

Sans selle, à bride renouée,

D'un piet et d’un oueil desferrée, Qui est de tous poins aveuglée ; Si que je sui à piet sans lance.

Et volentiers iroie en France,

Car moult desir que je vous voie.

Mais deffendu m'i ont la voie

Li pileur, li vens et la pluie

Et li yvers qui moult m'anuie,

Et especiaument la goute

Et mes chevaus qui ne voit goute ; Et j'y voy po, par saint Remy, Qui n’est mie trop bon pour my; Einsois est uns tres grans peris Qu’estre en porriens tous -ij- peris Et cheoir dedens une fosse,

Si ne morriens pas de la bosse.