COMMENT GARGANTUA NASQUIT EN FAÇON BIEN ESTRANGE

Eux tenans ces menus propos de beuverie, Gargamelle commença se porter mal du bas ; dont Grandgousier se leva dessus l’herbe, et la reconfortoit honnestement, pensant que ce fust mal d’enfant, et luy disant qu’elle s’estoit là herbée sous la saulsaye, et qu’en bref elle feroit piedz neufz (1), par ce, luy convenoit prendre courage nouveau, au nouvel advenement de son poupon ; et, encores que la douleur luy fust quelque peu en fâcherie, toutesfois que icelle seroit brève; et la joye, qui tost succéder oit, lui tolliroit (2) cest ennuy : en sorte que seulement ne luy en resteroit la souvenance. « Je le prouve, disoit-il ; nostre Saulveur dit en l’Evangile Joannis, xvi : La femme qui est à l’heure de son enfantement a tristesse; mais, lorsqu’elle a enfanté, elle n’a souvenir aucun de son angoisse. — Ha, dist elle, vous dictes bien, et aime beaucoup mieulx ouir tels propos de l’Evangile, et beaucoup mieulx m’en trouve que de ouir la vie de saincte Marguarite ou quelque autre capharderie (3).

— Courage de brebis, disoit-il, despeschez vous de cestuy cy, et bien tost en faisons un aultre. — Ha, dist elle, tant vous parlez à vostre aise, vous aultres hommes ! Bien, de par Dieu, je me parforceray, puisqu’il vous plaist. Mais pleust à Dieu que vous l’eussiez coupé! — Qnoy? dist Grandgousier. — - Ha, dist elle, que vous estes bon homme ! vous l’entendez bien. — Mon membre? dist il. Sang de les cabres (4) ! si bon vous semble, faictes apporter un Cousteau.

— Ha, dist elle, ja Dieu ne plaise ! Dieu me le pardonne !

(1) Accoucher.

(2) Enlèverait.

(3) Hypocrisie.

(4) Sang des chèvres ! Juron gascon.