MEUBLES ET USTENSILES

Jehan de Beaune , natif de Dijon , aagé de xxxvi ans ou environ, prisonnier es prisons du baille de Montpellier, par moy interrogué, presens maistre Pierre Granier et Jehan Medici, ou Consistoire du Conseil de la Court du Baille, quelz biens il a euz en garde et quelz biens il scet de Jacques Cuer, de Anthoine Noir, de Jehan de Village et autres facteurs et servicteurs dud. Cuer, dit que, un an et demi a ou environ, Perrecte, femme dud. Village, le manda venir devers elle en la maison dud. Cuer estant en ceste ville de Montpellier, ou il ala; laquelle Perrecte luy bailla lors unes lectres closes, que led. Village lui escripvoit, par lesquelles il luy mandoit et prioit qu'il fist compaignie a lad. Perrecte a aler a La Baume, ou elle vouloit aler ; laquelle Perrecte dist lors a il qui parle qu'elle vouloit mectre en seurecté, appert et en sauveté le plus qu'elle pourroit les biens estait aud. hostel pour envoyer a Marceille, et pria a il qui parle de faire les fardeaux desd. biens, et qu'ilz fussent portez ou logeis de il qui parle, lequel qui parle, qui avoit

acoinctance avec led. Village, pour ce qu'il avoit esté en galée avec luy et autres patrons de galees dud. Jacques Cuer, fu content de tenir compaîgnie a lad. Perrecte a aler aud. voiage , et aussi d'aider a faire lesd. fardeaux et les garder en sa maison ; lesquelz fardeaux furent faiz lors par Pion de Village, oncle de Jehan de Village, et une jeune fille qui avoit les clefs dud. hostel et par il qui parle.

Et dit, sur ce interrogué, que esd. fardeaux avoit des tapiz tant velus que reez cinq ou six, et une serge rouge de Caen, une vane blanche de couton , deux couvertures blanches de laine , de draps de lit deux xiines ou environ , de linge de table , cuervechées et autre linge assez grant quantité, qu'il ne saroit autrement declerer; et avec ce y estoient les robes de lad. Perrecte et de Jehanne , femme de Gymart, et aussi les robes dud. Village ; aussi y avoit deux beaulx et bons litz de duvet; lesquelles balles furent apportées de nuyt en la maison de il qui parle par aucuns porteflfexou gavaux(l), qu'il ne congnoist, et les leurfist apporter led. Pion de Village.

Et apportèrent oultre en sond. logis quatre basins et quatre chaufferetes de leton a laver mains, quatre chenetz, deux hastes de fer a routis, cinq ou six chandelliers de cuyvre, comme il luy semble, quatre haches, quatre voulges, ung chauderon, un pot de cuyvre, lequel pot de cuyvre il vendit a ung campanier demeurant en la rue du Pillier Saint Gille. duquel campanier il ne scet le nom, le prix de quatre escus, et les despendit en ung voiage qu'il fist a Marceille par devers led. Village. Aussi fu lors apporté en sond. logis certaine quantité de platz et potz a l'ouvrage de Valence ; et dit que , après que les choses dessusd. furent apportées en sond. logeis, il s'en ala a Saint Gille, dont il estoit lors viguier, ou il fut ung mois ou environ; pendant lequel temps led. Pion de Village fist apporter en sond. logeis un grant coffre de noyer, un bel dressouer ouvré, ou il y a deux fenestres fermans a clef, ung coffre paint de vert ferré de fer blanc, ung tablier et une table ronde de cyprès, qui sont encores en sa maison, et qui par moi y furent yer trouvées. Et, après qu'il fu retourné dud. Saint Gille en sond. logeis, lesd. Pion de Village et lad. Jacquette y vindrent pour emballer les choses dessusd. ; tous lesquelz biens dessusd., réservé ceulx qui encores sont en son logeis, furent enballés en quatre ou en cinq balles par lesd. Pion et Thomas de Village, lad. Jacquette et il qui parle ; lesquelles balles furent chargées en une charrette et menées a Peroux, et la furent chargées sur une barque de la galéc Saint Mlchiel et menées a Aiguesmortes.

Interrogué qui estoit le charretier qui menoit lesd. balles et qui les conduisoit, dit que ung nommé Le grant Bourguignon estoit charretier,

(1) Gavaux est le pluriel francisé par Dauvet du mot languedocien gavach , montagnard (gabalitanus).

et le loua il qui parle par Tordonnance desd. Pion et Thomas de Village, et conduisit il qui parle lad. charrette jusques aud. lieu de Peroux ; auquel lieu de Peroux lesd. balles furent chargées en lad. barque pour les mener en galée, comme dit est dessus. Dit oultre que , avant que lesd. balles furent faictes et menées , comme dit est , Lazarin Dandrea parla a il qui parle, et luy dist que led. Jehan de Village luy avoit escript en luy priant qu'il aidast a conduire ou faire conduire lesd. balles, et avisèrent led. Lazarin et il qui parle de marquer lesd. balles a quelque marque, afin que on cuidast que ce feussent marchandies et que on ne se doubtast point que ce fussent des biens dud. Cuer. Interrogué s'il y eut autres balles ou autres biens dud. Cuer chargiez en lad. charecte ou autrement transportez en lad. galée ou ailleurs , dit que , lorsqu'il fist transporter et mener les balles dessusd., il y avoit, en la maison de maistre Guillaume Le Barbier , demeurant en la rue de la Saunerie , deux balles , mais qu'il y avoit lors dedens il ne scet. Lesquelles deux balles il fist lors chargier et conduire avec les autres, et les marqua par l'ordonnance dud. Pion.

Dit oultre que, un an a ou environ, il receut unes lettres closes dudit Pion a luy adressans, par lesquelles led. Pion luy escripvoit qu'il recouvrast do Robin Deloule deux coffres et sept ou huit bouteilles et une boete de malvoisie et autres choses, que led. Pion avoit baillées et lessées en garde aud. Robin et a sa femme ; ausquelles lettres closes il qui parle se rapporte. Apres la recepcion desquelles lettres , led. qui parle parla aud. Robin et a sa femme , et leur demanda lesd. choses et mesmement les leur a demandées depuis Noël en ca. Lesquels Robin et sa femme luy ont tousjours confessé avoir lesd. choses, mais ilz lui ont dit et respondu qu'ilz ne luy bailleroient point , s'ilz n'avoient lettres de lad. Jacquette ; et, quelque poursuite et diligence qu'il ait faicte vers eulx, ne les a peu recouvrer, etc.

(Journal de Dauvet, fo« 140 v» à 142).

Commerce de Jacques Cœur.