CXXV« HYSTOIRE

De l'ordonnance et eschelles des batailles du roy Edouart d'Engleterre et à qui il les bailla et eneharga.

En tandis que le roy de France ordonnoit ses batailles, qui bien les sçavoit faire, le roy Édouart d'Engleterre fist et ordonna ossy briefment les siennes, et ne fist que II batailles d'archiers à II costés en la manière d'un escut. Et au milieu de eulx seroit le prince de Galles et le conte de Werwich, le conte de Noranstonne, le conte d'Arondel, le conte de Zulforch et grant plenté de grans chevaliers et de gens d'armes à l'eslitte, tous à pied. Et portoit la banière du prince monseigneur Richart Fils-de-Symon, ung hardit et moult preu chevalier. Et estoit la banière esquartelée

des armes de France et d'Engleterre aux lambeaux d'argent. Et son père le roy Édouart d'Engleterre seroit tout quoy derrière, et 1 evesque de Durâmes et monseigneur Godeffroy de Harcourt et pluseurs aultres grans seigneurs et chevaliers et escuiers, et archiers et gens d'armes leurs harnas et leurs chevaulx derrière eulx, séans sur leurs escus en atendant la grâce de Nostre-Seigneur et la victoire de la bataille. Et quant tous furent apparilliés d'une part et d'aultre, les II osts se commenchèrent à approchier. Il commanda le prince de Galles son fils à Dieu et à la Mère de Dieu et à monseigneur saint Jorge qu'ils le laissassent revenir de la bataille en vie, et le signa et béney.