CCI« HYSTOIRE

Comment le roy Jehan de France ala en Engleterre pryer au roy qu'il peust ravoir aucuns de ses ostagiers pour aller avoecqué luy en la croisie d'oultre mer.

Quant le roy Jehan de France et Philippe son fils eulrent esté grande espasse en Avingnon, et enchargié la croix d'oultre-mer, il print congiet au pappe Urbain et à tous les cardinaux, et se mist à chemin pour revenir en France. Et quant il eult tant chevauciet qu'ils vindrent à Paris, oîi ils furent moult festiés du duc Charles de Normendie et des aultres seigneurs du royalme, et qu'il se fut une espasse reposés et aisiés à Paris, il s'en partit et monta en mer à Boullongne, et ala en Engleterre pour parler au duc d'Orliens, son frère, et s'en ala à Saint- Thomas de Cantorbie, et puis en ung beau et joly manoir où le roy et la royne estoient, lequel manoir ou ostel on nomme Altem. Et là donna le roy d'Engleterre à disner et à souper au roy Jehan ; puis s'en party le roy Jehan, et s'en vint à Londres à l'ostel de Savoie, et là eult pluseurs parlemens pour les ostagiers ; car le roy Jehan voloit

ravoir le duc d'Orliens, son frère, et son fils et aucuns des aultres ostages qu'il voloit oster. Mais le roy d'Engleterre, ne son conseil ne le volurent point acorder, ne sy n'estoient point content qu'on eramenast les ungs sans les aultres, se le roy d'Engleterre n'avoit la somme totalle de l'argent qu'on luy devoit pour la paction et pour la renchon du roy Jehan de France délivrer et baillier.