CCIII^ HYSTOIRE

Comment le roy Jehan de France pria tant au roy d'Engleterre de ravoir aucuns ostagiers qu'il luy fut acordé, et comment une maladie le print, de laquele tantost après morut.

Pour continuer la matère encommenchie, touchant la venue du roy Jehan en Engleterre, comme dessus est dit, tant fist, tant pria, tant suplia et tant s'humilia le roy Jehan par devers le roy d'Engleterre, qu'il fut accordé que le duc d'Orliens, le duc de Berry et le duc de Bourbon s'en riroient avoec le roy, parmy tant que le roy Jehan en deraoura et s'oblega et jura de revenir toutes et quantes fois qu'il plairoit au roy d'Engleterre. Et par ainsy ils se pooient, quant leur plaisoit, partir, et le roy et la royne leur donnèrent souvent à disner.

Et en ce tamps print une grosse maladie au roy Jehan de France, laquele maladie il print à l'ostel de Savoie au dehors de la cité de Londres, et là s'acoucha le roy Jehan malade, et y fut tant gisant malade qu'il trespassa en ung lundy après Basques closes, dont le roy d'Engleterre et la royne en furent moult courc^hiés, et ossy furent tous les ostagiers qui estoient en Engleterre et tous les seigneurs duroyalme, et ossy furent tous ceulx de la communauté. On fist le roy embaussemer, et puis mettre en mer et puis mener à Paris.

Et adont prinrent Bertrand de Claiquin et le visconte d'Aussoire la ville de Mantes en la conté d'Évreux, qui estoit au roy de Navarre, et sy prinrent le pont et la ville de Meulent et les aultres villes d'emprès.

Et en ce tamps se rendy la royne Blance au duc Charles de Normendye.

CCIIIP HYSTOIRE.

Comment, entandis que le siège estoit devant Rouleboîse auquel estoient le duc de Normendie, le duc d'Ango et Bertrand de Claiquin, nouvelles vindrent que le roy Jehan de France estoit mort en Engleterj-e et qu'on l'apportoit à Paris.

En ce tamps estoit rais le siège par devant Rouleboise du duc Charles de Normendie, du duc d'Ango et de Bertrand de Claiquin. Adont leur vint nouvelles au duc Charles de Normendie et au duc d'Ango que le roy Jehan leur père estoit trespassés en Engleterre. Sy s'en alèrent vers Paris moult courouchiés et esbahis, et fut remandés Philippe le Hardy, qui estoit en Bourgongne lequel vint hastivement à Paris. Et quant tous les seigneurs qui conduisoient le corps du roy, furent près de Paris, on prépara et aorna le corps du roy Jehan, ainsy qu'on debvoit faire, et le coucha-on dedens ung lit tout ainsy comme s'il dorraist, et luy mist-on la couronne aux flourons d'or dessus le chief, et le couvry-on de draps d'or, et le porta-on avant Paris, ne plus, ne moins comme s'il dormesist. Et ses enfans aloient après luy tous noirs vestus, et le roy de Chippre ossy, et puis après eulx tous les seigneurs, ducqs, contes, viscontes, séneschaulx, mareschaulx, connestable, admiraulx, arcevesques, éyesques, abbés, prélats, chevaliers, escuiers, nobles, surnobles, gentils hommes, gouverneurs, baillis, provosts et tous aultres ensiévant chascun en son ordre jusques à Saint-Denis. Et là fut ensépulturés dedens le cuer moult honnourablement et fort solempneusement, et l'arcevesque de Sens en Bourgongne en grant dévotion

dist la messe. Et puis, après le disner, il fut conclut de retourner dedens Paris, et fut le conseil pris qu'on couronneroit Charles de Normendie, l'aisné fils du roy Jehan, en la cité de Rains, à la Tritiitë.

Et droit adont estoit le captai de Beuf le gascon à tout grant plenté de Navarois et d'Englecqs en la duchié de Normendie.