CCXXVI« HYSTOIRE
Comment les compaignies de gens d'armes cassées et aultres se rassambloyent et espandoyent parmy pluseurs terres et espécialment sur les terres du pappe et des cardinaulx et en plusieurs lieux du royalrae de Sécille, pillant, prenant, tollant, levant, occhisant, appatissant, tuant, renchonnant comme gens qui avoient appris et accoustumé de vivre de proye, et comment il fut avisé qu'on en feroit pour en estre quitte.
En ce tamps estoient les compaignies sy grandes en France que merveilles seroit à dire, ne à penser, et s'espardoient par le pays toutjusques entour Avinguon, et herrioient, cuvrioient et tournioient moult durement le pappe et les cardinaulx et leurs terres ; car les guerres estoient partout faillyes. Sy ne sçavoient la plus grande partye de ces compaignies où gaignier, car ils avoient apris à pillier et à vivre d'avantage : sy ne s'en pooient tenir. Sy s'avisèrent les sages hommes du royalme que, s'en n'y metoit remède par aulcune voye soubtille, qu'ils destruiroyent le royalme et assez des aultres pays marchissans. Sy fut advisé qu'on les envoieroit en Espaigne, pour destruire ung roy qui en estoit seigneur, lequel estoit, sycomme renommoit couroit, renoyës et plain de grant cruaulté et de très-mauvaises œuvres, et estoit excommeniés du pappe Urbain V° de ce nom. Sy fut mandé Henry le Bastart d'Espaigne, qui estoit frère bastart de ce mauvais roy, qu'on nommoit damp Piètre, lequel Henry estoit autour Avingnon, et pareillement furent mandés les aultres capitaines des compaignies, et fut traittiet par devers eulx qu'ils yroient en Espaigne guerrier ce roy damp Piètre,
affin d'obtenir le royaume d'Espaigne , se conquerre le pooient. Sy luy furent chargiés ces compaignies pour luy aidier. Et pour ceste cause misrent le pappe et le roy de France grant paine à la délivrance de monseigneur Bertran de Claiquin, lequel monseigneur Jehan Chando tenoit prisonnier de le bataille d'Auroy. Sy fut délivrés parmy cent mille frans qu'ils en payèrent, et fut commis monseigneur Bertran capitaine souverain de tous ces gens d'armes, qui bien estoient XXX mille, après monseigneur de Bourbon, qui se faisoit chief de ceste besongne pour contrevengier sa suer que ce roy Piètre avoit eue à femme et qu'il avoit fait morir maisement, et sy estoit la dame moult sainte et bonne femme, sycorame on disoit. Et avoec eulx alèrent des princes, des chevaliers, c'est-assavoir monseigneur Witasse d'Aubrecicourt, monseigneur Hue de Cavrelée, monseigneur Gaultier Huet, monseigneur Mathieu de Gournay, monseigneur Perdieas de Labret et pluseurs aultres ossy. Et se s'y mist le seigneur de Beaugeu, qui s'appelloit Anthoinne, à grant routte, et pluseurs chevaliers, tels que monseigneur Ernoul d'Audrehem, mareschal de France, monseigneur le Besgue de Villaines , monseigneur le Besgue de Villers, le seigneur d'Antoing, monseigneur Allart de Briffeul, monseigneur Jehan de Noefville, monseigneur Gauvain de Bailleul, monseigneur Jehan de Berguettes, l'Allemant de Saint- Venant et moult d'aultres, lesquels exploitèrent assez bien, sycomme vous orez avant K
* Ici s'arrête le ms. de la Bibliothèque de l'Arseûal.
