XXIX« HYSTOIRE

La grande, superflue et innombrable assamblée de gens que fist à Aras et là environ le roy de France dit Philippe le Bel pour courrir sus et destruire les Flamens.

Quand ce vint environ II ans après la bataille de Courtray, le beau roy Philippe de France manda monseigneur Charles de Valois son frère en la Mourée où il estoit, et y avoit grande espasse demouré.

Après manda le conte d'Evreux, le conte d'Artois le josne, et ducqs et contes, séneschaulx, mareschaux, amiraulx, régens, viscontes, marcquis, haulx baillis, chèvetaines, capitaines, chevaliers, escuiers, gentils hommes, nobles, surnobles, fiefvés, arièreliefvés et toutes manières de gens d'armes. Et pour plus accroistre son nombre, fist-il rappeller banis, surbanis, soellars, pillars, agaitteux, boutefeux, endebtés, registres, et touttes gens de communes qui armes et bastons pooient porter, fist-il venir. Et fut si grande son assamblée qu'elle fut sans nombre. Et fîst tous s6s osts assambler à Aras et là environ, ainsy qu'il avoit d'usage ; et fist enquerre et demander par oîi il poroit mieulx passer et approchier Flandres pour combattre aux Flamens et pour avoir voie mains contrestant pour

passer oultre. Et on luy dit que tous les pas, pays et ponts et passages estoient prins, fors au lez devers Orchyes. Et adont eultle roy en conseil qu'ils s'en yroient droit à Orchyes par devers le Mont-en-Peules.

Adont fist-il tout son ost deslogier et les harnas trousser et tous les osts et ses eschelles de capitaineries tourner celle part. Et passèrent par dessoubs Valenchiennes au lez devers Rayme et par devers Condé. Adont vinrent-ils à Orchyes. Et là environ s'arestèrent les osts du roy de France et se reposèrent une pièche.