LXII« HYSTOIRE

Comment madame Jehenne de Valois contasse de Haynault alla en France parler au roy son frère.

Quant le parlement eult séjourné à Valenchiennes une grande espasse de taraps en grans despens en attendant le roy de France, l'autre conseil s'avisa qu'ils envoieroient au roy de France Jehenne de Valois sa suer contesse de Haynault sçavoir pour quoy il n'envoioit à la journée ainsy qu'il appertenoit.

Sy y alla la dite contesse Jehenne et riens n'y peult besongnier, ne exploitier en manière que le roy y volsist nulluy de par luy envoyer. Sy s'en revint moult courouchye à Valenchiennes au parlement et leur conta ce qu'elle avoit trouvé. Puis n'y demoura gaires qu'elle n'y ralla seconde fois. Sy emmena avoec luy monseigneur Jehan de Haynault et aultres chevaliers, et ce fut environ l'Assencion mil IIP et XXXVII. Sy leur fist-on grant feste et grant honneur, et leur donna le roy Philippe response et lettres qui yroient au roy d'Engleterre, et donnoit 'respit à tous ceulx qui estoient venus d'Engleterre à ce parlement XV jours tant qu'ils fussent retournés en Engleterre. Et adont se partirent madame de Haynault et monseigneur Jehan de Haynault et prinrent congiet du roy et s'en revindrent au parlement et raportèrent ce que le roy leur avoit chargiet et dit. Et, ces nouvelles oyes, le parlement se partit à tant, et s'en ralla chascun en son pays.