Ms. precedentibus

Johanna, Dei gratia regina Jerusalem et Sicilie, ducatus Apulie et principatus Capue, Provincie et Forcalquerii ac Pedimontis comitissa, magnifico viro Raynaldo de Ursinis militi, comiti Tallacocii, generali capitaneo ad guerram, consiliario et fideli Nostro dilecto, gratiam et bonam voluntatem. Disponentes et intendentes, si comode fieri poterit, solidare et conducere ad Nostra servitia et stipendia virum magnificum Guillelmum Filibach militem cum brigata sua usque scilicet ad ducentas lanceas et ultra, prout melius tibi videbitur faciendum, de fidei, industrie et circumspectionis tue meritis confidentes, tibi de certa Nostra scientia presentium Lenore committimus ac potestatem plenariam et facultatem liberam impartimus ut eumdem Guillelmum cum dicta sua brigata usque scilicet ad ducentas lanceas et ultra, prout tibi melius visum erit, vice, nomine et pro parte Nostra conducas, solides et recipias ac conducere, solidare et recipere ad Nostra servitia et stipendia possis et valeas, pro illis gagiis seu stipendiis ac eo tempore et sub illis convencionibus, promissionibus et pactis quibus cum eodem Guillelmo seu alio pro eodem melius poteris convenire, dantes et concedentes tibi plenam et omnimodam licentiam, potestatem et speciale mandatum recipiendi, solidandi et conducendi ipsum Guillelmum ad dicta Nostra servitia et stipendia et quantitates pecunie pro dictis stipendiis oportunas offerendi, terminos ad solucionem illarum petendi et recipiendi, fidem, promissionem ab eis recipiendi, tractandi, incipiendi, mediandi, concludendi et concordandi tractatum, receptiones ipsius ad Nostra servicia ut prefertur, cautelas publicas seu privatas faciendi et recipiendi ac penas apponendas in contractibus stipulandi illasque omnibus oportunis clausulis et sollempnitatibus roborandi ac instrumenta oportuna et debita faciendi, fieri rogandi et recipiendi omniaque alia et singula faciendi que tibi in premissis et circa premissa videbuntur melius expedire, eciamsi talia forent quod mandatum exigerent speciale Nosque facere possemus et valeremus si interessemus personaliter in premissis. Nos enim ipsarum presencium tenore promittimus et pollicemur expresse de certa Nostra scientia Nos ratum, gratum habituras et firmum totum et quicquid per te in premissis et singulis premissorum actum, tractatum, ordinatum fuerit sive gestum eaque omnia et singula, ex nunc prout ex tunc, ratificantes et acceptantes, illa decernimus et volumus illam vim eumdemque vigorem, robur et efficaciam obtinere ac si per Nos principaliter facta forent, has Nostras litteras, magno Nostro pendenti sigillo munitas, tibi in hujus rei testimonium concedentes. Datum Neapolis... anno Domini millesimo .CCCLxxx°., die .xxviiij. agusti, .iije. indictionis, regnorum Nostrorum anno .xxxviij°.