CXXV. — 5 novembre

Poursuites contre un orfèvre de Rouen qui, malgré les ordonnances de son métier, a vendu à un changeur une statuette, de saint Louis en forme de reliquaire et un calice, Le tout d'argent doré, achetés par lui du bâtard de T'ingry, prisonnier des Français, pour l'aider à payer sa rançon. (Orig. parch., sceau perdu. — Arch. de la Seine-Inférieure, F. Acquisition de 1889.)

L'an de grace mil quatre cens trente trois le jeudi chinquiesme jour de novembre, en la cohue à Rouen, l’assise dudit lieu seant devant nous Guillaume de la Fontaine, lieutenant general de noble homme monsieur Jehan Salvain, chevalier, baïlli dudit lieu de Rouen, et de la souveraineté et exempcions de Gisors. Sur ce que le procureur du Roy nosire sire et les gardes du mestier d’orfaverie a Rouen disoient vers Jehan Pellevillain, changeur et Pierres le Gay que puis certain temps ença ledit le Gay avoit vendu audit Pellevillain qui avoit acheté dudit Gay ung ymage de monsieur Saint Louys en fourme de reliquaire qui estoit armoyé et ung calice d’argent dorez, que faire ne povoient mais estoit deffendu selon leurs ordonnances, contendans vers eulx et chascun d’eulx que veues lesdictes ordonnances ilz feissent amende chascun en son regard dudit cas et requerans que sur ce lesdiz Pellevillain et le Gay respondissent de bouche. Pourquoy nous les feismes venir devant nous et jurer a dire verité sur ledit cas; lesquelx nous distrent et confesserent, c’est assavoir ledit Pellevillain que verité estoit que il avoit acheté dudit le Gay lesdis ymage et calice, qui avoient lors esté pesez en son change en la presence dudit Gay, et a son advis pesoient sept mars ou environ, et lui sembloit que actendu que ledit Gay estoit homme notable et de bonne renommée, que ainsi fere le povoit; et ledit Gay

dist que verité estoit que il avoit vendus audit Pellevillain les choses dessusdictes que il avoit semblablement achetées au bastard de Tigry par certain pris qu'il desclairoit que paié en avoit audit bastard pour soy racheter des mains des adversaires ou il disoit estre lors prisonnier. Veues lesquelles responces, sur ce que lesdiz procureur du Roy et gardes contendoient come dessus vers lesdiz Pellevillain et le Gay qu'ilz feissent amende, ilz distrent que ilz vouloient veoir lesdictes ordonnances, pour lesquelles veoir le cas s’arresta et fu continué jusques a demain. Donné comme dessus. — P. Juillois, xij d.