CXXVI. — Rouen, 30 décembre
Permission accordée par Henri VI aux religieux de Saint- Ouen de tenir les plaids de la Forêt Verte dans leur abbaye, à cause de l’insécurité des environs de Rouen hantés par les brigands et ennemis des Anglais. (Orig. parch. scellé sur simple queue. — Arch. de la Seïne- Inférieure, H, Fonds de Saint-Ouen, Forêt Verte.)
Henry par la grace de dieu Roy de France et d’Angleterre, Au bailli de Rouen et a tous noz autres justiciers et officiers ou a leurs lieuxtenans salut. Receue avons l’umble supplicacion de noz bien amez les religieux abbé et couvent de l’eglise Saint Ouen de Rouen estant de fondacion royal contenant comme ilz aient acoustumé en temps de paix et tranquilité tenir ou faire tenir en leur Verte forest ou es mectes d’environ assise auprez de Rouen leurs plais et juridicion qu'’ilz ont a cause d’icelle forest et ne peuent iceulx supplians trouver aucune personne de justice qui ose ou vueille tenir leursdiz plaiz en icelle forest ne es parties d’environ pour le fait et occasion des guerres,
doubte et crainte des brigans et autres noz ennemiz et adversaires qui se tiennent et conversent en icelle forest et environ, et par ce plusieurs abuz et dommages sont fais en ladicte forest tant par les personnes coustumiers en icelle que autres qui par ce moyen sont et demeurent impugnis ou grant dommage et prejudice desdiz supplians et mesmes de nous, attendu que icelle forest est a tiers et dangier. Pour laquele cause il leur est besoing de iceulz plaiz tenir et faire tenir ordinairement ainsi qu'il est acoustumé ; laquele chose ilz ne pourroient faire en icelle forest obstant ce que dit est, ainsi qu'’ilz dient, requerans leur estre sur ce pourveu de nostre gracieux et convenable remede. Pour ce est il que nous ces choses considerées, voulans tousjours justice estre faicte, gardée et excersée au mielx que faire se peut, ausdiz supplians avons octroié et octroions de grace especial par ces presentes que : jusques a un an a compter de la date d’icelles ilz puissent tenir ou faire tenir de quart d’an en quart d’an (1) leurs diz plaiz justice et juridicion qu'ilz ont a cause de leur dicte forest par leurs seneschal, soubz seneschal, baïlli verdier et autres officiers en ladicte ville de Rouen, qui n’est distant de ladicte forest ne du lieu ou ilz ont acoustumé tenir et faire tenir leurs diz plaiz et juridicion en icelle forest que d’une lieue et demie, et les subgez d'’icelle demourans ilec environ, et est le plus prouchain lieu seceur pour eulz et leurs subgez, en l’ostel et abbaye desdiz supplians au lieu ou ilz ont acoustumé tenir et faire tenir les plaiz et juridicion de leur baronnie dudit lieu de Saint Ouen, pourveu que ce ne soit en diminucion de noz drois et ne tourne a consequence et prejudice a nous ne a autrui pour le temps avenir. Et voulons et nous plaist que
() Il y a eu à cette place un grattage sur lequel on a récrit les mots soulignés.
les sentences, condempnacions, jugemens, adjudicacions et tous autres exploix qui seront faiz oudit hostel et abbaye desdiz supplians par leurs gens et officiers vaillent et soient d’autelz effect et vertu comme se faiz, donnez et prononcez estoient es lieux d’ancienneté acoustumez. Si vous mandons et enjoingnons et a chascun de vous si comme a lui appartendra que lesdiz supplians vous faictes, souffrez et laissez joir et user plainement et paisiblement de nostre grace, congié et licence sans leur faire ne donner ne a leurs seneschal et sousseneschal, baïlli verdier et autres officiers dessusdiz ledit temps durant aucun empeschement au contraire, Car ainsi nous plaist il et voulons estre fait de nostre dicte grace par ces mesmes presentes non obstant transgression de lieu a autre et lettres quelxconques subreptices impetrées ou a impetrer a ce contraires. Donné à Rouen le xxx° jour de decembre l’an de grace mil quatre cens trente trois et de nostre regne le douziesme. — Par le Roy a la relacion du Conseil. Cayet.
