XXXVIII. — 24 février 1426 (n. st
Quittance de Pierre Amyot, plâtrier, pour réparations à la cheminée de la cuisine de l’hôtel de la Vicomté de l’Eau à Rouen. (Arch. de la Seine-Inférieure, Fonds Danquin. Original.)
À tous ceulx qui ces lettres verront ou orront Pierres du Buse, garde du scel des obligacions de la viconté de Rouen, salut. Savoir faisons que par devant Pierres Charite, tabellion juré en ladicte viconté, fu present Pierres Amyot, plastrier, demourant a Rouen, lequel congnut et confessa avoir eu et receu de honnourable homme et sage Michiel Durant, viconte de Rouen, la somme de sept livres six soulz tournois qui deubz lui estoient pour sa paine et sallaire d’avoir fait et reparé une cheminée en la cuisine de l’ostel de la viconté de l’eaue a Rouen, en laquelle le feu estoit nagueres prins, et mesmes avoir fait et reparé plusieurs trous de planchers et pans de paroys et iceulx renduys et aussi recouvert de tieulle au tour de ladicte cheminée qui de necessité il esconvenoit faire et reparer en icellui hostel; et en ce faisant avoir trouvé par ledit Amyot plastre, plastreaulx, tieulleaulx, mortier et toutes matieres et paines d'ouvriers a ce necessaires et convenables ; et oultre avoir fait faire le widege de ce et porter a la riviere; de laquel somme de vij 1. vi s. t. ledit plastrier se tint pour bien paié et content par devant ledit tabellion, et en quicta le Roy nostre sire, ledit viconte et
tous autres a qui quictance en peult et doit appartenir. Present a ce Alixandre de Berneval, maistre des euvres de machonnerie du Roy nostre sire ou bailliage de Rouen, lequel certiffia et tesmoingna icelle besoingne, ouvrage et reparacion estre bien deuement et loyalment faicte par la maniere dessus desclairée par ledit Amyot et que tant avoit cousté par marchié a lui fait et baïllié a rabez en la maniere acoustumée. En tesmoing de ce, nous a la relacion dudit tabellion avons mis a ces lettres le scel desdictes obligacions. Ce fu fait l’an de grace mil quatre cens vingt cinq le dimence xxiiij° jour de fevrier ; presens Iehan du Clos et Iehan la Saye. — [Signé] Charite (avec paraphe).
