XLIV. — 20 juillet

Ordonnance de paiement d’une somme de 53 sous tournois à Geoffroy Therage pour exécution de sentences contre Guillaume Buisson et Jean Olivier, condamnés l’un à la potence et l’autre au pilori. (Arch. de la Seine-Inférieure, Fonds Danquin. Original.)

Pierres Poolin, lieutenant general de noble homme monsieur Jehan Salvain, chevalier, baïlli de Rouen et de Gisors, au viconte de Rouen ou a son lieutenant salut. Nous avons tauxé a Guieffroy Therage, maistre de la haulte justice du Roy notre sire audit lieu de Rouen, pour sa paine et sallaire d’avoir trayné sur une elae au bout d’une charrette Guillaume du Buisson, natif du Becquet pres le Pont de l’Arche, depuis les prisons du Roy nostredit seigneur jusques a la justice et audit lieu l’avoir pendu,

qui a ce avoit esté condampné pour ses demerites. Ztem aussi avons tauxé audit Guieffroy pour sa paine et sallaire d’avoir mené en une charrete par deux jours de vendredi Jehan Olivier depuis lesdictes prisons jusques en la Vieu tour et audit lieu l’avoir pillorié ung mistre en sa teste par iceulx deux jours de vendredi, qui a ce avoit esté semblablement condampné pour ses demerites ; c’est assavoir pour avoir trayné ledit du Buisson x solz tournois, pour ladicte claye deux solz, pour l’avoir pendu x solz, pour gans xij deniers et pour ladite charecte v solz; et avoir pillorié ledit Olivier pour chascun jour v solz, pour ladicte charrecte pour chascun d’iceulx jours v solz et pour le mistre v solz; montent les parties dessusdictes la somme de cinquante trois soulz tournois. Sy mandons que des deniers de vostre recepte vous paiès, baïllés et delivrés ladicte somme audit Guieffroy et par rapportant ces presentes avec quictance d’icellui Guieffroy ce vous sera aloué en voz comptes et rabatu de vostre recepte aïnsi qu’il appartendra. Donné a Rouen le xx° jour de juillet l’an de grace mil ccce vingt six. — Du Bust (avec paraphe.)