XXXII. AULTRE CHANSON NOUVELLE

Jésus de sa puissance My veuille secourir Et my doune allégeance De tous mes déplaisirs, Ou je mourray martyr Si je n'ay allégeance; J'ai perdu mes déduicts Et toute ma plaisance.

Raison est que l'amye De bonne affection, Voyant sa bonne grâce Aussi son bon regnom, Et en mon cueur son nom Mis en lettre dorée D'une alliance serons Jusqu'à mort finée.

Hélas ! ma chère amye, Prenez bon reconfort, De vous ay eu envie Plus que souffrir la mort; Point n'aurons de discord Si elle ne my presse, Nous serons d'ung accord Devant que mon cueur cesse.

Souvent je ris et chante, Ou j'ay le cueur marry, Soustenant sa puissance Aussi son bon party ; Faut-il que pour leurs dictz Ces jaloux plains d'envie,

My fault le pays fuyr Et laisser ma partie.

Je vous prie, mes fillettes, Ny parlez plus de moy, Vous avez une manière Comme un chacun le voit Comme un chacun le voit; Mais elle n'est pas bonne, Vous avez parlé de moy Au plus grand tort du monde.

Ceste chanson fut faicte Ung jour devers le soir D'ung compagnon honneste, Doncques il a bon vouloir.

Son cueur vist en esmoy Et en grand desplaisance, C'est que plus il ne voit Celle que son cueur pense.