XXXV. AULTRE CHANSON

Sur le chant : Adieu, Dames de France.

Adieu mon espérance, Adieu mon souvenir, Adieu ma confience Jusques à revenir.

Vous m'avez délaissée, Et si ne sçay pourquoy; Se à tort suis blasmée, Las ! pardonnez-le moy.

J'ay faict, pour vous complaire, Tout vostre bon plaisir, Sans en rien vous desplaire, Oncques n'en eut désir.

Je suis habandonnée, Et si ne sçay pourquoy ; Se à tort suis blasmée, Las ! pardonnez-le moy.

Ne vous souvient-il mie Que un jour entre vos bras, Me tenant embrassée Me dictes plusieurs cas, Faisant maintes promesses En jurant vostre foy; Se à tort suis blasmée, Las ! pardonnez-le moy.

C'est faulte de prudence De croire de legier; Il en vient morale offence Comme pouvez juger.

Mon amy, je vous prie, N'en soyez en esmoy; Se à tort suis blasmée, Las ! pardonnez-le moy.

Se à vostre départie Vous m'eussiez dict adieu, Mais j'estoye endormie Près de vous en ce lieu, Pensant estre embrassée De vos bras pour tout drap ; Se à tort suis blasmée, Las ! pardonnez -le moy.

Je pleure et souspire Sans consolation; De danser ni de rire Je n'ay dévotion, Craignant que n'ayez prins D'aultres amours que moy; Se à tort suis blasmée, Las! pardonnez-le moy.

Faictes-moy donc certaine Se voulez revenir ; Car en souffrant telle peine Me conviendra mourir, Ou me mandez nouvelles Et la cause pourquoy; Se à tort suis blasmée, Las ! pardonnez-le moy.

64 flIANSONS