XLI. CHANSON NOUVELLE

Faicte sur le département des galios qui, sont partis de la cité de Paris, et se chante sur le chant: Hélas! que vous a faict mon cueur, Madame, qui le gardez tant.

De Paris nous sommes partis Neuf vingt galios prisonniers Pour nous en aller sur mer Servir le noble Roy Françoys.

A Marseille sommes arrivés En grande desplaisance,

Dont maulgré nous nous faut aller Servir le Roy de France.

Adieu Paris, noble cité, Là où j'ay longtemps demeuré; Adieu Rouen en Normandie, Là où j'ay apprins mon mestier; Adieu Orléans où je fus né, Où est ma femme et mes enfans, Car maintenant me faut laisser Le pays bien piteusement.

Adieu mon père le premier Et ma mère pareillement, Adieu mes parens et amys, Adieu ma femme et mes enfans ; Adieu aussi tous mes amys, Hélas ! sans nul mettre en oubly; Car maintenant me fault aller Servir le Roy des fleurs de lys.

Quand nous f usmes en Avignon, Nous y trouvismes grand légion De galiotz bien enferrez, Lesquels venoient de Dauphiné, Lesquels nous ont accompagnez En grande desplaisance Jusqu'à Marseille le grand port Du Royaulme de France.

O mauldictz Turcs et Sarrasins, Vous nous donnez de griefz tour mens; Laisser nous fault la fleur lys Où sont nos femmes et nos enfans.

Adieu vous dis tous nos parens, Car j 'allons mener guerre

Dessus la mer contre les Turcs, Dieu nous doint la victoire.

Nous prions Dieu le Roy des roys

Qu'il nous veuille tous secourir,

Affin que puissions une foys

Avec nos amis revenir

Et quelque foys nous resjouyr

Et faire bonne chère,

Et servir Dieu de bon cueur

Et Marie sa mère.