DIVA PECUNIA

Qui argent a la guerre il entretient,

Qui argent a gentilhomme devient,

Qui argent a chascun luy fait honneur,

C’est monseigneur ;

Qui argent a les dames il maintient,

Qui argent a tout bon bruyt lui advient,

Qui argent a c’est du monde le cueur,

C’est la fleur.

Sur tous vivans c’est cil qui peut et vault, Mais aux meschans tousjours argent leur fault.

Qui argent a pour sage homme on le tient, Qui argent a tout le monde il contient,

Qui argent a tousjours bruyt en vigueur,

Sans rigueur;

Qui argent a ce qu’il luy plaist détient,

Qui argent a de tous il a faveur ;

C’est tout heur

D’avoir argent quant jamais ne deffault,

Mais aux meschants tousjours argent leur fault.

Qui argent a à tous plaist et revient,

Qui argent a, chascun devers luy vient,

Qui argent a, sur luy n’a point d’erreur Ne malheur;

Qui argent a, nul son droict ne retient,

Qui argent a, s’il veut, à tous subvient,

Qui argent a il est clerc et docteur Et prieur ;

S’il a des biens chascun l’esliève hault,

Mais aux meschans tousjours argent leur fault.