F EPITAPHE EN FORME DE BALLADE

Que feit Villon pour luy et ses compaignons, s’attendant estre pendu avec eulx.

Frères humains, qui après nous vivez,

N’ayez les cueurs contre nous endurciz.

Car, si pitié de nous pouvres avez,

Dieu en aura plustost de vous merciz.

Vous nous voyez cy attachez cinq, six ;

Quant de la chair, que trop avons nourrie,

Elle est piéça dévorée et pourrie,

Et nous, les os, devenons cendre et pouldre.

De nostre mal, personne ne s’en rie ;

Mais priez Dieu, que tous nous vueille absoudre! 10

Se vous clamons, frères, pas n’en devez Avoir desdaing, quoyque fusmes occis Par justice. Toutesfois, vous sçavez,

Que tous les hommes n’ont pas bons sens assis;

Intercédez doncques, de cueur rassis,

Envers le filz de la Vierge Marie :

Que sa grâce ne soit pour nous tarie,

Nous préservant de l’infernale fouldre.

Nous sommes mors, âme ne nous harie ;

Mais priez Dieu, que tous nous vueille absoudre ! 20

La pluye nous a debuez et lavez,

Et le soleil, desséchez et noirciz ;

Pies, corbeaulx, nous ont les yeux cavez,

Et arrachez la barbe et les sourcilz.

Jamais, nul temps, nous ne sommes rassis ;

Puis çà, puis là, comme le vent varie,

A son plaisir, sans cesser, nous charie,

Plus becquetez d’oyseaulx, que dez à couldre.

Hommes, icy n’usez de mocquerie,

Mais priez Dieu, que tous nous vueille absouldre ! 30

François Villon.

Envoi.

Prince Jésus, qui sur tous seigneurie,

Garde qu’enfer n’ayt de nous la maistrie ;

A luy n’ayons que faire ne que souldre ;

Ne soyez donc de nostre confrairie,

Mais priez Dieu, que tous nous vueille absouldre