DES MALADIES DE CESTE ANNEE

Ceste année les aveugles ne verront que bien peu, les sourdz oyront assez mal, les muetz ne parleront guières, les riches se porteront un peu mieulx que les pauvres, et les sains mieulx que les malades. Plusieurs moutons, beufz, pourceaulx, oysons, pouletz et canars mourront, et ne sera sy cruelle mortalité entre les cinges et dromadaires. Vieillesse sera incurable ceste année à cause des années passées. Ceulx qui seront pleureticques auront grand mal au cousté . Les catharres descendront

ceste année du cerveau és membres inferieurs ; le mal des yeux sera fort contraire a la veue ; les aureilles seront courtes et rares en Guascongne plus que de coustume. Et régnera quasi universellement une maladie bien horrible et redoubtable, maligne, perverse, espoventable, et mal-plaisante, laquelle rendra le monde bien estonné, et dont plusieurs ne sçauront de quel boys faire flèches, et bien souvent composeront en ravasserie syllogisans en la Pierre philosophale, et és aureilles de Midas. Je tremble de peur quand je y pense: car je vous diz qu’elle sera epidimiale, et l’appelle Averroys vu Colliget faulte d’argent. Et attendu le comète de l’an passé et la rétrogradation de

François Rabelais.

Saturne, mourra à l’Hospital un grand marault tout catharré et croustelevé, à la mort du quel sera sédition horrible entre les chatz et les ratz, entre les chiens et les lièvres, entre les faulcons et canars, entre les moines et les œufz.