D. BERNARD, D. LOPE

D. Bernard.

Quoy ! rien ne vous succède? et le prince et l'Infante De cet indigne accueil ont traicté vostre attente?

D. LoPE.

Ils m'ont traicté d'un nom que j'ay bien mérité, Si quelque espoir encor flatte ma vanité, Si, sacrifiant plus à mes erreurs passées, J'en fais le fondement de mes folles pensées, Et si, dans les périls d'une fameuse mort, Je ne vais contenter la cruauté du sort. J'ay veu cent fois le port, et la vague, plus forte, Quand j'y pense arriver, à l'instant me r'emporte ; J'ay faict tout ce que peut, pour preuve de sa foy. Un captif pour son maistre, un subject pour son roy; En mille occasions j'ay la Parque affrontée, Mesme par les mespris ma foy s'est excitée; Et plus j'ay pour l'Estat achevé de travaux. Plus il me fait d'injure et se rit de mes maux: La terre ainsi, de fleurs et de moisson parée, Est prodigue à la main dont elle est déchirée, Et, d'un servile effort ranimant sa vigueur. Donne à qui plus contre elle exerce de rigueur. Mais le plus rude affront dont je ressents l'atteinte Est ce fatal appas, cette mortelle feinte Dont la superbe Infante a voulu colorer